Guwahati, Naitung 09 : San ngut ki khynnah ki ba dei ki phetwir Rohingya ki la ioh ban phet krad noh napoh ka jaka peit bniah (observation home) hapoh Silchar ka ba hap hapoh Cachar District ka Assam.
Kine ki san ngut ki khynnah Rohingya ki la lait phet ha ryngkat ki arngut kiwei pat ki khynnah rit ki ba dei ki trai shnong na kane ka jaka peit bniah ka ba don hapoh Meherpur hapoh Silchar da ka ba pynpra ia ka kynroh jong ka iing.
Kane ka jingjia ka la jia ha ka 1 tarik mynta u bnai, bad ka la paw pyrthei dang ha kane ka sngi Thohdieng ba la lah, ong ka tyllong khubor.
Ha ka 29 tarik u Jymmang ba ladep, ki bor pulit ka Silchar ki la kem bad set noh ia ki 26 ngut ki phetwir Rohingya ka ba kynthup ia phra ngut ki longkmie, hynriew ngut ki shynrang bad 12 ngut ki khynnah.
Kane ka kynhun ka la wan poi hapoh Kamakhya steshon ha Guwahati napoh Delhi da ka rel ha ka 28 tarik u Jymmang ba la dep bad leit shapoh Silchar lyngba ka lynti surok lyngba ki artylli ki kali hadien ba ki la wan poi hapoh Silchar ha ka step ka ba bud.
Napdeng kine ki 26 ngut ki Rohingya, ki bor pulit ki la pynkynriah noh ia ki khynnah sha ka jaka peit bniah bad ia kiwei pat shapoh Silchar Central Jail.
