Shillong, Nailur 15 : U Myntri Rangbah ka Jylla Conrad K Sangma, ha ka sngi Thohdieng, ula pyntip ba ka Sorkar Jylla ka la phaikhmat mynta sha kiwei ki thain jong ka Jylla ban pyntreikam ne wanrah ia ka lynti rel.
Kane kala mih hadien ba ka jingthmu wanrah lynti rel ha Ri-lum Khasi, kala mad ia ka jingpyrshah kaba jur na ki kynhun bapher bapher kynthup ki Sengbhalang kiba khuslai ia ka jingwan rung kyrthep ki mynder ri.
U Conrad haba iakren bad ki nongthoh khubor, ula iathuh ba ki briew ka Northeast Frontier Railway (NFR) kila kren ia kaba dei ba kam mih satia kano kano ka jingkylli ban pynduh noh ia ka lynti rel lane ka jingkylli ban shu pyntrei donbor ia ka.
Ula ong ba ka project ba nyngkong ( Ha Ri-lum Khasi) kala mad ia ki diengpyngkieng namar kila don ki jingeh ha lynti iaid jong ka bad ka Sorkar kan hap ban pynbeit ia kine ki jingeh kaba lah ban shimpor.
“Ia ka mynta, katto katne ka song pisa kala don ban pyntrei ia ka project lynti rel hynrei namar ki kam kim shym la iaid shakhmat, ka Sorkar India kan sa buh jingkylli ba sa katno por yn shu buhkai ia kane ka pisa. Kumta, ngi hap ban pyrkhat la ngin pynphai noh lane pyntreikam noh sha kiwei ki project hapoh ka Jylla bad ban pyrshang pyndonkam ruh ia kane ka pisa ba kan nym shu sepei kai….kumta, ngi la pyrshang ban wad lada don kiwei ki thain ka Jylla, kiba kloi ban pdiang ia ka lynti rel bad kane ka jingiawad kala iaid shakhmat” ong u Conrad.
“Nga la pynpaw ia kane kajuh ka jingsngew sha u Myntri lynti rel ka Sorkar Pdeng bad u Myntri ula ong ha nga ba u kloi ban pdiang ia kane ka jingtyrwa. Kumta, ngin hap ban bishar na kane ka liang bad peit lada don kiwei ki project kiba ngi lah ban pyniaid shakhmat bad lada don, ngi kwah ban pyntrei noh ia ki lem kumta kan long ka jingduhnong ia ka Jylla haba phai sha ka pisa namar ka pisa kala poi na ka bynta ki katto katne ki kam jong ka lynti rel” ula bynrap.
Nalor kane, u Myntri Rangbah ula ong ba lada phai sha ka roi ka par, baroh ki kwah ban iohi ba ka lynti rel ka dei ban wan sha ka Nongbah bad kan kyntiew bha ia ki lad pyniasoh, ka khaii ka pateng bad ka ioh ka kot.
“Ki don bun ki jingtynjuh, ki don ki jingsngewkhia na ki kynhun bapher bapher bad kumta ngi kwah ban iasyllok shuwa bad baroh ki kynhun bad hooid ym shym la don mano mano ruh ba ong ban shu buh sah ia ka hynrei ka ishu hangne ka long ba ka pisa kala shu sah na ka bynta ki katto katne ki project” ula ong haba bynrap “Namar ka dei ka kam ba nyngkong eh ka bym shym la iad, ngin hap ban iaid da kiwei pat ki sienjam bad ha kajuh ka por ngin dang iai bteng ban iakren bad ban wad ia ka lynti ba iasngewthuh jingmut lang ba kumno ngin lah ban pyniaid shakhmat ia ka project namar ka lynti rel ka dei kaba biang eh ia ka Jylla bad ka dei kaba lah ban pyntrei da ki bynta bynta….baroh ki lad ki lynti ki don”.
Haba kylli la ka jingpyntreikam ia ka IPL kan plie lynti ia ka jingwan ka lynti rel ha Ri-lum Khasi bad Jaintia, u Conrad ula ong “Ka ILP ka dei ka ain kaban pyrrkhing ia ka jingrung ki briew ba nabar ka Jylla hynrei ki don ruh kiwei ki lad ki lynti kiba lah ban leh eiei halor kane ka jingsngewkhia”.
“Kumta…ka ILP kam dei eh ka mat ba sngewkhia, ka jingsngewkhia hi ka dei ka jingwan rung beain ki mynder bad ki bar Jylla bad ki briew ki sngew ba ka ILP lane don ki kynhun kiba sngew ba ka ILP ka iarap ha kaban tehlakam ia kine ki jingsngewkhia. Ki don ruh kiwei ki lad ki lynti bad dei na kata ka daw ngi la wanrah ia ka MRRSA bad kiwei kiwei ki lad. Namar kata ka jingiakren kala don bad ki Kynhun bapher bapher kila buh ia kine ki kyndon, to ngin sa iakhmih kumno ki kam ki iaid. Ngin dang iai iakren bad ngin pyrshang katba lah ban pynbeit noh ia kane ka kam” ula ong.
