Shillong, Nailar 22 : Ka Myntri ka Koit ka Khiah Kong Ampareen Lyngdoh ha ka sngi Ba-ar, kala pyntop ba ka Jylla ka don mynta ha ka khep ka jingpynkhreh ban pynkylla da ki hospital Sorkar kum ki Medical College.
Haba iakren bad ki Nongthoh Khubor, ka Myntri kala ong “Kawei ka kam kaba ka Jylla Meghalaya ka dei ban sngewthuh shai ka long ba lada phim pat long kiba la khreh ia ka Medical College, phi dei ban pynbna ia ka Medical College namar 85 haduh 93 seat kiba ngi ju ioh na ka bynta ki samla jong ngi kum ki bhah pule (sponsored seat) na baroh ki Jylla kin sa sangeh noh ban wan. Namar kata, ngin sa ioh ia ki Medical College tad ynda ngi la biang nadong hadong”.
Ka Myntri kala ong ba ia mynta, ka jingpyntrei ia ka Tura Medical College kala mad ia ka jingtynjuh namar ka daw jong ka jingtei.
“Ka mang tyngka kala nang kiew. Kala don ka jingbym shai bad jingbym iahap jingmut kaba la mih hapdeng ka jingpyntrei ia ki jingtei, ka contract bad ka Tnad kiba hap ban pyntrei ia kane ka jingtei ha Ri-lum Garo. Mynta ngi la iabuddien ia ka kam bad u Myntri Rangbah ban khmih ia kaei ka lynti kaba lah ban pynioh ia ngi haduh T.136 klur ha kaban pyndep ia ka Tura Medical College” kala ong.
Hangne ha Ri-lum Khasi, ka Myntri ka ong ba ka Sorkar ka dang peit mynta ia kawei pat ka model ha kaban pyndonkam da ki jingtei kiba don ha Nongbah Shillong bad ki jaka ba marjan ban pynkylla kum ki Medical College.
“Ngi la phai sha ka Civil Hospital, ngi la phai sha ka jingtei ha Umsawli, ngi la phai sha ka Ganesh Das, Reid Chest Hospital-kaba ngi la don lypa ki jingtei kiba biang. Ailad ia ngi ba ngin shong bishar bha ia kane ka kam. Ynnai ia kyrkieh than” ong ka Myntri.
“Peit ia kaei kaba jia ha Jylla Nagaland bad kiwei ki Jylla kiba la pynbna dang shen iala ki jong ki Medical College, Mynta ki Nongshongshnong jong kine ki Jylla, kin nym ioh shuh ia ki bhah pule naka Sorkar India. Haduh san snem kin ym don satia ki samla pule doktor na kine ki Jylla, ki ban leit pule naka bhah ka Sorkar Jylla” kala bynrap.
Pule ruh: Dawa ka HYC ia ka Tnad kam Pohiing ban pyntreikam pura noh ia ki 7 tylli ki Border Outpost
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
