Shillong, Rymphang 17: U Myntri ka Tnad Bording Bah Metbah Lyngdoh ula pynbna ba ka sorkar ka don ia ka jingthmu ban wad ia ki lad ban sdang pynmih bording lyngba ka Thermal Plant da kaba buh thong ba kan pynmih 550 MW ka Thermal Power.
Haba jubab ia ka jingkylli ha ka iingdorbar ha ka sngi Baar, u Bah Lyngdoh ula ong, “Ka Tnad ka thmu ban pynmih bun ia ka bording lyngba ka Thermal Power”.
Ka sorkar ka dang wad ia ki lad kiba lah ban tei ia ki Thermal Power Plant lane ban sdang hi nalade ne lyngba ki kynhun shimet kiba pynmih bording ne da ka jingiatreilang ban leh ia katei ka kam”.
Ka jingthmu ka kynthup ia ka project ba 250 MW ban pyntrei da ka sorkar ne da kaba iatreilang bad kiwei (Joint Venture) bad 300 MW lyngba ki kompani shimet kiba pynmih bording, bynrap u Bah Lyngdoh.
