Shillong, Naiwieng 17: Ka Hynniewtrep Achik National Movement (HANM) hynne ka sngi Thohdieng kala pyntip ba kan leit iakynduh ia u Myntri Rangbah ka Assam Himanta Biswa Sarma bad ia ki Member of Parliament jong ka thain Shatei Lam Mihngi, ban pan iaka jingkyrshan bad ban phah shimkhia lem halor ki 3 tylli ki mat jingdawa jong ka jylla.
“Ka seng HANM ka don ia ka jingthmu ban leit iakynduh ia u Myntri Rangbah ka Assam Himanta Biswa Sarma ba yn kyrshan bad ban kren lem halor ki mat jingdawa kiba hakhmat eh jong ka jylla Meghalaya kiba kynthup iaka jingdawa ban pyntreikam iaka Inner Line Permit (ILP), ban pynrung noh iaka ktien Khasi bad Garo ha ka Eight Schedule jong ka riti synshar ka ri bad ban pynbeit noh ia u pud u sam hapdeng ka Meghalaya bad Assam” ong u President ka HANM Bah Lamphrang Kharbani haba iakren bad ki nongthoh khubor.
Ula ong, ka seng kan leit ban iakynduh ruh ia ki MP jong ka jylla na ka thain shatei lam mihngi ban pan iaka jingkyrshan ka jong ki bad ba kin kren lem, khnang ba yn lah ban pynurlong noh ia kitei ki mat jingdawa jong ka jylla.
“Ha ka 3 tarik u Naiwieng, ngi la pynlong ia ka jingiakhih ha Jantar Mantar, Delhi bad ka seng kala dawa ba dei ban pynbeit noh ia u pud u sam ha ka thain shatei lam mihngi baroh kawei bad kumjuh ban pyntreikam noh ia ka ILP ym tang ha ka jylla Meghalaya hynrei ha baroh ki jylla jong ka thain shatei lam mihngi” ong u President ka HANM.
U Bah Lamphrang ula ong ba ka seng ka thrang ban lah ban pynurlong noh ia ki 3 tylli ki mat jingdawa bad ka seng kan ym shong kli kti bad kala leh ia la ka kamram ban pynsngew ia kitei ki mat jingdawa sha ka sorkar pdeng ba kan leh eiei noh.
“Kaba sah mynta ka shong ha ka jingstad jong ki 3 ngut ki MP ka jylla ban iasyllok bad kiwei pat ki MP jong ka thain shatei lam mihngi khnang ba kitei ki mat jingdawa kin urlong noh” ula ong.
U Nongialam ka HANM ula iathuh ruh ba ha ka jingiakynduh dang shen ia u ophisar jong ka Ministry of Home Affairs ha nongbah Delhi, ula ai ka jingkular ia ka seng ba ka Ministry kan sa shimkhia ban bishar ia ki jingdawa jong ka seng kiba kynthup iaka ILP, ka ktien Khasi bad Garo bad ban pynbeit noh ia u pud u sam hadeng ka Meghalaya bad Assam.
