Shillong, Rymphang 16: Shiphew ngut ki kyrtong Kynthei jong ka seng Congres kin iakhun iaka elekshon MLA kaban long haka 27 tarik mynta u bnai bad namar ka jingtam ki kynthei da 10,53,173 ngut ban ia ki shynrang ha ka jylla, ka seng Congress ka khmih lynti ba kane kadei ka sienjam kaba paka bha.
Ka All India Congress Committee (AICC) Media Coordinator ka Bobbeeta Sharma bad ka President jongka Meghalaya Pradesh Mahila Congress Kong Joplin Scott Shylla ha ryngkat ka jingdonlang ki kyrtong kynthei jongka Congress kiba kynthup iaka Kong Jhanika Siangshai, Kong Bethleen Dkhar bad ka Dr Banidashisha Kharkongor, kila pynshai sha ki lad pathai khubor halor ka matdpeng, da ki kynthei na ka bynta ki kynthei bad ia ki sienjam kiba ka Congress kan shim na ka bynta ki kynthei ha ka jylla.
Ki nongialam Congress ki buh ia ka thong ban thaw ia ki lad ki lynti ban pynlong ia ki kynthei kiban ïeng hala ki jong ki kjat, kiba skhem jingmut bad kiba khlain haka ioh ka kot.
“Kum ki kynthei ngi sngewsarong baka jylla Meghalaya kadei kaba ai jait sha ka kmie bad ki kynthei ki don iaka bynta kaba khraw bad iaka kyrdan. Ia ki kynthei ha Meghalaya la tip kum kiba trei shitom bha bad kiba shemphang, hynrei la sakhi pat, ba bun ki kynthei ki dang hap iaid iaka lynti kaba jngia bha ban long kumta kita kiba lah ban shaniah dalade bad kiba khlain haka ioh ka kot” ong ka Bobetta Sharma.
Ka Congress kala pynpaw ba ka sngewkhia iaka jingdonkam ki kynthei haka jylla ban ioh iaka jingsiew ne tulop kaba bha khang ba kin lah ban pynbiang iala ka iing ka sem bad ialade ruh kumjuh.
Kila pynpaw baka seng ka buh ia kiba bun ki jingtyrwa na ka bynta ban kyntiew iaka jingim jong ki kynthei, kaba kynthup iaka jingai jingsumar ei ia baroh ki nongshong shnong ka jylla, ban ai jinghikai kyrpang ia ki kynthei khnang ba kin lah ban ieng hala ki jong ki kjat, ban ai iaka tulop kaba T.3000 ia baroh ki longkmie kiba duk kiba kamai marwei, ban pynshong skul ei ia ki khynnah kynthei naduh na Kindergarten haduh Klas XII, ban pynshna bha ia ki longïing baduk da kaba pyndonkam da ki mar kiba bha, ban ai ei iaka bording kaba 200 Unit ia man la ka longïing kiba duk.
Ka Congress kala kular ruh ban ai ei iaka LPG Cylinder shisien ka 4 bnai ia man la ki longing kiba duk, ban shna kyrpang iaka ïew na ka bynta ki kynthei ha kaba yn pyniaid iew ia ki mar kiba pynmih hi da ka jylla Meghalaya.
Nalor kane, ka Congress ka kular ruh ban buh iaka Special Urban Police Force kaban long katkum kane ka juk kaba mynta, kaban don iaka jingia dei bad ki paidbah bad kaba don iaki atiar kaban lah ban tem ia ki kam sniew, da kaba pyndonkam ia ki kor ki bor bad ban bhah kyrpang ruh ia ki kam naka bynta ki kynthei haka kam pulit.
