Shillong, Risaw 28 : U Chief Electoral Officer (CEO) ka Jylla Bah FR Kharkongor, ula phah ia ka jingujor pyrshah ia u Myntri Sorkar Bah Dasakhiat Lamare ba kynnoh sam pisa sha ki paidbah ka Nongkrem Constituency, sha ka Deputy Commissioner ka East Khasi Hills ba kan leh ia kaba donkam namar ka Model Code of Conduct (MCC) kam pat treikam satia hapoh ka Jylla.
“Nga la shimkhia ia kane ka jingujor. Namar mynta ka Model Code of Conduct kam pat treikam satia, ia kane ka ujor la phah sha ka Deputy Commissioner, ka ban sa leh ia kaba donkam kat kum ki kyndon bad ki ain” ong u Bah Kharkongor haba iakren bad ki nongthoh khubor.
U CEO ula pyntip ba ia kane ka jingujor la mudui da ka kynhun jong ki Nongshongshnong.
Haba kylli, u Bah Kharkongor ula ong “Kumba nga ong, ka MCC kam pat treikam satia hapoh ka Jylla ia mynta (ka jinguor) kan hap hapoh ki kyndon ain ba don hangne bad ka Deputy Commissioner kan sa leh ia kaba donkam halor kane”.
“Shisien bala treikam ka MCC, hangta ka kyndon jong ka ain Elekshon bad ka MCC kan sa treikam pura” ula ong.
Halor ka hukum ka Iingkashari Supreme Court ba iadei bad ka jingsam ei ia ka pisa bad kiwei kiwei, u CEO ula ong “…Ngim pat ioh ia ka jingbthah kaba shai halor kane ka kam. Shisien ba ngi la ioh ia ka jingbthah kaba shai, hangta ngin sa lah ban peit bad leh ia kaei kaba donkam ban leh”.
Ha ka 24 tarik Risaw, u Myntri ka Tnad PWD (Building) bad MLA ka Mawhati Bah Dasakhiat Lamare ula pynpaw ba um salia satia ban shah set ha along namar ka jingiarap ia ki paidbah ka Nongkrem Constituency, ka jaka ka ba un iakhun ia ka elekshon MLA 2023.
U Bah Dasakhiat ula kren ia kane sha ka kynhun ki briew kiba la ujor pyrshah ia u sha ka Election Commission of India (ECI) ba kynnoh ba ula sam pisa sha kiba bun ki longiing hapoh ka Constituency haba pynlong ia ka jingialang jong ka NPP ha Nongkrem.
U Bah Dasakhiat un ia aireng pyrshah ia u MLA shimet ka Nongkrem Bah Lambor Malngiang, uba la pan mynta iaka ticket na ka United Democratic Party (UDP).
U Myntri ula pynksan ba la wan na ka Iing, kaba lah ban iarap ne ai jingiarap ia kino kino ki briew kiba donkam jingiarap haba bynrap, namat kata, um salia satia wat lada u shah kem namar ka jingiarap ia kum kine ki briew.
“Wat ki bahaiing jongnga hashuwa ba kin rung sha ka kam sain pyrthei, ki ju trei shitom bad u Kpa jong ngi mynshuwa u dei tang u nongniah trok hynrei mynta ula dei uwei na ki riewsain pyrthei bala rim ha Jylla…ta ka daw ka dei ka kamram jong ngi ban iarap ia kito kiba donkam jingiarap la ki dei na Nongkrem Constituency ne na kano kano ka Constituency jong ka Jylla” ong u Bah Dasakhiat.
