Shillong, Jylliew 30 : U MDC ka BJP na Tura Bernard N Marak ula phah tuklar ha u Myntri kam Pohiing ka Ri Amit Shah halor ka jingkynnoh khlem pyntreikam ia ki kyndon iateh soskular iasuk ka ANVC ( Agreed Text Settlement) bad ban pynlong ia ka jingialang ka Centre-Level Monitoring Committee ha Tura.
Ka ATS, ka soskular ki lai liang mamla bala ha ka 24 tarik, 2014, hapdeng ka Sorkar India, ka Sorkar Meghalaya bad ka ANVC bad ANVC-B, ka thmu ban pynkhlain ia ki Autonomous District Council (ADCO ha Meghalaya bad ban wanrah ia ka jingshongsuk ba shirta lem bad ka roi ka par ha ka thain.
Ha ka shithi bala phah sha u Amit Shah ha ka sngi U Blei, u Bernard ila pynpaw ia ka jingsngewkhia halor ka jingbym pyntreikam ia ka soskular, dakaba ong ba wat hapdeng ka jingwan pyndem bad ban im ha ryngkat ka imlang sahlang jong ki spah ngut ki ehrang, kiba bun kim shym la ioh ia ka song jingiarap kumba la kular. Ki tnad bala ithuh ban aiti noh sha ki ADC ruh ym pat shym la pynkynriah bad ka Monitoring Committee ka khlem long shuh naduh u snem 2019.
Une u MDC ula pynpaw ruh ia ka jingbym lah jong ka Sorkar Jylla ban thaw ia ka State-Level Monitoring Committee bad ka State Finance Cmmission, kumba la mynjur ha ka soskular.
Ula kynnoh baka pisa bala mang na ka bynta ki ADC la pyndonkam shawei bad pynslem ruh lyngba ki Heh Ophisar, kaba khein dewthala ia ka jingmut ba shisha jong ka soskular.
U Bernard ula kyntu ia u Myntri kam Pohiing ban bthah ia u Joint Secretary (North East), Ministry ka Home Affairs, ban pynlong ia ka jingialang jong ka Centre-Level Monitoring Committee ha Tura kham kloi kat kaba lah.
Ua ban jur ba ka jingiai pynslem ban pyntreikam ia ki kyndon bala iateh soskular yn niew ia ka kum ka jingshet kylla jong ka soskular lai mamla bad buh ka jingma ban pyniap duh ia ka jingkyrmen bad ka jingshaniah jong ki paid Garo ha ka Sorkar Pdeng.
