Shillong, Lber 07: Ka All Ri-bhoi Garo Headman Association bad ka All Khasi Hills Achik Federation (AKHAF) hynne ka sngi Palei, kila dawa na u Myntri Rangbah ka Jylla u Conrad K Sangma ban tuklarlem halor ka jingshah weng syrnod Rangbah Shnong ki Rangbah naka jaidbynrtiew Garo hapoh ka thain Radi Marwet Ri-bhoi District.
Haba kren sha ki lad pathai khubor hadien ka jingkynduh ia u Myntri Rangbah, u Adviser ka All Ri-bhoi Garo Headman Association u Nickel R Marak, u la iathuh ba ka don kawei ka sengbhalang kaba la mih ban pyrshah iaki Rangbah naka Jaidbynriew Garo ban bat Rangbah Shnong bad kane kala pynlong iaka Khasi Hills Autonomous District Council (KHADC) ban nym ai jingithuh shuh iaki daka ba ai kyntait ruh ban ai syrnod.
U Nickel u la iathuh ba ki Jadbynriew Garo ki la long ki nongshongshnong hapoh ka thain Raid Marwet Ri-bhoi District naduh ka por ba synshar ka Sorkar Phareng bad naduh kato ka por, ki jaidbynriew kiba im hapoh kane ka thain ki dei tang ki Garo bad Karbi.
U la ong naduh 2022, kala mih kawei ka sengbhalang kaba la pyrshah iaki Rangbah naka Jaidbynriew Garo ban bat iaka kam Rangbah Shnong daka ba kynnoh ba kim don hok ban bat iaka kam shnong.
“Ngi dei na ka juh ka Ri bad ka Jylla. Ngi la im hapoh kane ka thain naduh ka por ba synshar ka Sorkar Phareng hynrei mynta kala mih kynsan kawei ka sengbhalang kaba dawa naka District Council ban nym ai jingithuh shuh lane ban nym ai syrnod iaki Rangbah naka jaidbynriew Garo ban long Rangbah Shnong” ong u Nickel.
Haba kylli u Nickel u la iathuh ba naka liang u Myntri Rangbah ka Jylla u la bthah iaki ban iakynduh ia u CEM ka KHADC ban ia pynbeit halor kane ka kam.
Lah ban kdew hangne ba kane ka Seng kaba pyrshah ia ki Garo ban bat kam Rangbah Shnong ka dei ka seng HNYM kaba ialam da u Bah Luis Dohtdong kum u President.
 hynne ka sngi Palei, kila dawa na u Myntri Rangbah ka Jylla u Conrad K Sangma ban tuklarlem halor ka jingshah weng syrnod Rangbah Shnong ki Rangbah naka jaidbynrtiew Garo hapoh ka thain Radi Marwet Ri-bhoi District.){kind=link}