Shillong Nailur 12: Palat 1000 ngut ki khynnah pule barim jong ka Pine Mount School kiba don ha kylleng ki ri ka pyrthei kila phah daka jingthoh sha u Myntri Rangbah ka jylla u Conrad K Sangma ban tuklar mardor halor ki jinglong jingman bad ki jingkynnoh pyndonkam bakla haka skul Pine Mount, kaba dei ka skul bala rim tam haka thain shatei lam mihngi.
Kitei ki khynnah skul barim ka Pine Mount ki la dawa na u Myntri Rangbah ban suspon mardor iaka Principal katba ka jingtohkit ka dang iaid shakhmat halor ka jinglong jingman jong ka skul bad dei ban buh da ka por ban pyndep iaka jingtohkit kaban khmih ia ki jingkynnoh pyndonkam bakla bad jingbamsap da ki bor pyniaid jong ka skul bad ka Principal.
Ki la dawa ba dei ban don iaka Independent Educational Audit ia ka skul ha kaba iadei bad ka RTE bad ki kyndon jingbthah jong ka Swacch Bharat bad ban pyntreikam mardor iaka Jal Jivan Mission ban pynbiang iaka umbam umdih ha ka skul.
Ban pynbha mardor iaka rukom pyniaid iaka ‘Boarding’ jong ka skul bad ka kynhun Audit kadei ban pynkhreh mardor iaka ‘Plan’ ban pynbha iaka koit ka khiah bad ka jingshngain jong ki jingtei kiba don haka skul.
Ki khynnah barim ka Pine Mount ki la pynpaw iaka jingsngewsih halor ka jingshisha ba katei ka jaka pule kaba la don da ki spah snem, la pyniaid ha kata ka rukom ba la hiar syndon sha tbiañ, watla ka sorkar ha ki snem kiba la leit kala pynpaw iaka jingdonkam ban tei ia ki skul kiban iasyriem kum ka Pine Mount ha kylleng ki bynta jong ka jylla, hynrei kala kyntait pat ban khmih ia ki ishu kiba la saphriang kum ka khlam ha ka skul.
Kine ki Khynnah pule barim ka skul kila ai ka jingkyrshan ia ki nonghikai skul. Kitei ki khynnah skul barim kila pynpaw ruh ba kadei ka kamram ka jong ki ban iada iaka skul bad ban pynthikna ba ki nonghikai bad ki khynnah skul ki dei ban ioh ia ka hok jong ki.
