Shillong, Naitung 05: Ka Hills Farmers Union (HFU) Riwar Block hynne ka sngi Balang, kala kyntu ia ka Myntri ka rep ka riang Kong Ampareen Lyngdoh, ba kan tuklar lem halor ka jinghiar dor u synsar bad kiwei ki mar rep napoh ka thain Riwar Pynursla.
Haba kren sha ki lad pathai khubor u President ka HFU Riwar Pynursla Block bah Bishal Khongsei ula iathuh ba ki mar rep hapoh ka thain kum u synsar, soh marit khlaw bad kiwei kiwei ki mar rep kila hiar dor bha bad kane ka wanrah ia ka jingduh nong kaba khraw iaki nongrep jong ka thain.
U bah Bishal Khongsei ula iathuh ba haki snem bala dep, ka dor jong u synsar ka long T.130 haduh T.140 hynrei mynta ka kynti ka dor kala hiar haduh T.70 kaba la wanrah ka jingduh nong iaki nongrep.
Ula iathuh ba nalor ka jinghiar dor ki mar rep khamtam u synsar, ki nongrep ka thain Riwar Pynursla kila shem jingeh ruh haba iadei bad ka jingrep ia u soh niamtra namar ki symbai soh kila bam khniang bad kane ka ktah iaka jinglah pynmih soh ki nongrep, lada wan ka por ban kheit soh.
“Ka Myntri kala kular ba kan sa khot daka jingialang baheh haka 10 tarik mynta u bnai haka jingdon lang ki ophisar bad ki stad naka tnat ka rep ka riang ban iakren bad baroh ki nongrep napoh ka jylla na ka bynta ban sngap iaka jingeh haba iadei bad ka jinghiar dor ki mar rep bad haka juh ka por ban ai jinghikai kumno ki nongrep ki lah ban pynmih kham bun iaki mar rep jong ki” la ong u bah Bishal.
Pule lang ia kane: Manipur: Iaid paidbah palat 2000 ngut ki VDP ban pynrem ia ka jingkhrai khlieh ia u David Thiek
