Shillong, Nailur 22 : Ka kynhun na ka Post Graduate Student’s Union (PGSU) ka North Eastern Hill University (NEHU), Tura Campus, kala kyntu ia u Lat ka Jylla CH Vijayashankar ba un tuklar lem ha ka ban pynkut noh ia ka kynrum kynram bad ka jingkyrduh pisa da ka University.
Ka kynhun kala aiti ruh ia ka dorkhas sha u Lat ka Jylla kaba kdew ia ka jinglong jingman ba lyngkruh lyngkrang hapoh ka Campud, kaba la iaid mynta la jan lai snem.
Ka Union ka ong ba san tylli ki academic department kim don satia ia ki kamra klas ba pura, kaba pynbor ia ki samla pule bad ki nonghikai ban shong klas ha ka jaka ba pynbeit shipor. Ki jingdonkam ba man ka sngi kum ka umbam umdih ba khuid, ki jingdonkam ha hostel, laboratories bad ki bos ruh kim biang satia.
Ka jingkhate ia ka mang tyngka dang shen kala buh ia ka campus haka jingma ban khyllem, pynsangeh ia ka jingthungkam nonghikai, jingpynkiew kyrdan bad ka rukom pyniaid kam.
Ki samla pule ki mad ia shibun ki jingeh kynthup ka jingioh pyndonkam ia ki tiar ki tar ba donkam ha ka jingpule bad kumjuh ruh ia ka lawei ka bym thikna. Ka Department of Master of Social Work (MSW) ba bei tyngka hi dalade, ka dei kaba don jingma duh, kaba treikam khlem ka jingithuh ba shirta bad ka jingkyrshan da ki bor pyniaid.
Ka Kynhun ka PGSU kala kyntu ia u Lat ka Jylla ba un tuklar bad ban pyntreikam ia ki lad ki lynti ha ka ban pynbeit ia kine ki jingeh. “Ngim lah ban buh jingma ia ka lawei ha ka pule ka dangle jong ki hajar ngut ki samla pule” ong u Vice President ka PGSU Chakram D Sangma.
Ka Union kala ban jur ba khlem ka jingkyrshan pisa bad ka jingpynkylla ia ka rukom treikam, ka campus ka don ka jingma ba lah ban nym iaid shuh kumba la thmu bad duh noh ia ka nam”.
 ka North Eastern Hill University (NEHU), Tura Campus, kala kyntu ia u Lat ka Jylla CH Vijayashankar ba un tuklar lem ha ka ban pynkut noh ia ka kynrum kynram bad ka jingkyrduh pisa da ka University.){kind=link}