Shillong, Rymphang 02: Ka Khasi Students’ Union (KSU) ha ka sngi Thohdieng, kala dawa ia u Myntri ka tnat Bording Abu Taher Mondal ban tuklar halor ka jingslem ban thungkam Assistant Engineer (Electrical/Mechanical) hapoh MeECL kaba la sahkut palat 4 snem bad ban pynduh jait iaki kam bamsap hapoh ka tnat.
Haka shithi sha u A.T Mondal, u Chairman of ka KSU Employment Monitoring Cell u samla Reuben Najiar ula ong “Ngi dawa badei ban tuklar mardor halor ka jingslem khot Interview thepkam kumba la kdew ha neng bad kiwei ki kam hapoh 4 tylli ki Corporation naka bynta ban pyntyllun iaki kam bad naka bynta ka bha ka miat ki samla kiba la pyndep iaka eksamin”.
Ula ong baka ka seng ka dap daka jingsngew khia halor ka jingbym lah ka MeECL ban pynlong personal interview naka bynta ka kam Assistant Engineer (Electrical/ Mechanical) naduh 2019.
Ka eksamin ki samla naka bynta ka kam Assistant Engineer (Electrical/Mechanical) la pynlong daka MeECL haka 13 Naitung 2019 bad la pyllait iaka thup haka 19th Nailar, 2019.
“Haka jingpynbna, 24 ngut ki samla kila pyndep iaka eksamin bad kiba la shah jied naka bynta ka personal interview ka ban long haka 26th tarik Nailar 2019 hynrei haka 22 tarik Nailar la pynmih daka jingpynbna ba iaka Interview la pynsangeh shwa tad haduh dala pynbna da kumwei hynrei mynta la 4 snem tam ka MeECL ka khlem pat khot” la ong u samla Ruben bad ula ong “Naka liang ka seng kala kynduh ia u Director (Corporate Affairs) ka MeECL haka 11 tarik Kyllalyngkot 2024 bad la iathuh ba ka tnat kam lah ban thepkam thymmai naduh 2019 namar ka that ka kyrduh pisa”.
“Kum kane ka daw ka seng kam lah ban pdiang bad ka Corporation ruh kam lah ban rieh haka daw ba kyrduh pisa ba kam lah ban thungkam namar ka seng ka shem ba ka Corporation kala pyndonkam bakla iaka pla tyngka ka ban ialam shaka jingkyrduh pisa ka tnat” ula ong.
Nalor kane ka seng kala dawa ruh ban don daka jingtohkit halor ki jingshah kynnoh kam bamsap hapoh ka tnat MePDCL bad kiwei kiwei de.
“Kum kine ki kam bamsap bad ki jingpyndonkam bakla iaka pisa ha MePDCL bad kiwei ki Corporations ym dei ban shah bad namar kane donkam ban tohkit bniah bad kino kino ki ophisar kiba donkti kidei ban shah pynshitom katkum ki ain” la ong u samla Ruben.
Ula ong ia kane katkum ka kaiphod jong ka Comptroller bad Auditor General of India 2022-23 ha kaba ki Corporations ki lah dei ban kiar naka jingpynlut phut bad ban kunai pisa daka ba pyndonkam haki kam ba kongsan eh.
Ula ong ba ka jingthurmur ka MePDCL ban aikam hapoh ka SAUBHAGYA shaki contractors Kala wanrah ka jingduh nong haduh T.156.14 klur. Ia kane la leh pyrshah iaka jingai jingmut ka Cabinet Secretary ka Sorkar Pdeng kaba la pyni iaki kam bamsap hapoh ki Corporation bad ki heh ophisar jong ka Jylla.
 ha ka sngi Thohdieng, kala dawa ia u Myntri ka tnat Bording Abu Taher Mondal ban tuklar halor ka jingslem ban thungkam Assistant Engineer (Electrical/Mechanical) hapoh MeECL kaba la sahkut palat 4 snem bad ban pynduh jait iaki kam bamsap hapoh ka tnat.){kind=link}