Shillong, Risaw 25 : Ka Khasi Students Union (KSU), South Khasi Hills District Unit, kala iakynduh hynne ka sngi ba-ar ia u Myntri ka Tnad Pule Puthi ma Lahkmen Rymbui ban dawa ia ka jingtuklar halor ka jingduna palat ki jaka pule Higher Education ba kynsai ha Sohra, East Khasi Hills District.
Haba iakren sha ki nongthoh khubor, u Vice President samla Riches Malniang ula pyntip ba ka Seng kala ban jur ba u Myntri ka Tnad Pule Puthi u dei ban wanrah noh ia ka tnad pule Science bad Commerce ha Sohra Govt College bad ban wanrah ruh ia ka Higher Secondary School ha ka thain Khat-ar Shnong.
Kat kum ka jingong u samla Riches, haduh mynta ka Sohra Govt College ka don tang ia ka lain pule Arts haba ong ruh ba ka thain Khat-ar Shnong ka donkam palat ia ka Higher Secondary School naba ia mynta ki don tang artylli ki Secondary School ha ka thain.
Kat kum ka dorkhas, ka KSU kala ong ba ka Sohra kaba dei ka thymmei jong ka pule ka dangle ha ka Jylla hadien ka jingwanrah ia ki dak thok Khasi ha u snem 1984 da u Rev Thomas Jones.
“Kane ka thain ka don ia palat 200 tylli ki Shnong bad ka jingdon briew ba kot kumba 90,000 ngut bad ka dei tang kane ka thain ha ka Jylla jong ngi kaba don ia artylli ki jaka ai jinghikai ia ki Nonghikai. Ka dei ruh ka thain ba don haduh 3 tylli ki examination Centre jong ka Matric kaba lah ban pynshong thoh eksam ia palat 2000 ngut ki samla pule ba iakhun ia ka SSLC bad kawei ka Examination Centre jong ka HSSLC” ong ka dorkhas.
“Ka dei ruh ka Sub-Division ba hakhmat eh haba phai sha ka jingpass bha jong ki samla pule ba iakhun ia kine ki eksam haba ianujor bad kiwei ki Sub-Division ka Jylla. Hynrei, ka thain kala mad ia kiba bun ki jingeh khamtam ha ka Higher Education kabym shym la phaikhmat ne leh eiei da ka Sorkar” kala bynrap.
Ka KSU-SWKH kala ong ba ki don tang 8 tylli ki Higher Secondary Schools (kynthup ka Sohra Government College bad kawei ka College) bad ka don ruh ia bun eh ki samla kiba sangeh ia ka jingpule shiteng por hadien ba pyndep ia ka SSLC ha kaba napdeng ki 2000 ngut ba iakhun ia ka eksam, palat 1500 ngut kila pass ia ka eksam katba tang 10% kiba leit pule ia ki kyrdan ba halor ha Shillong ne ha kiwei kiwei ki jaka jong ka Jylla katba kiwei pat kila hap ban pynkut ia ka jingpule lane wad rung klas ha ki jaka pule ba don ha ka thain.
Ka KSU kala ong ba ki 8 tylli ki jaka pule Higher Secondary kiba don ha ka thain mynta ki lah ban pynrung klas tang kumba 450-500 ngut ki samla.
“Tang artylli ki jaka pule kiba don ia ka lain pule Science (ka Ramkrishna Mission H/s School bad ka Sohra Acedemy H/S School), bad artylli ki jaka pule kata ka St,John Bosco Boys H/S School, Sohra bad ka St Edmund H/S School, Mawrong ha ka lain pule Commerce” pyntip ka dorkhas.
Ka KSU kala ong ba da ka jingkhang ia ka Mawmluh Cherra Cement Limited bad ka jingtehkyndon ia ka jingtih maw bad shyiap, kala ktah jur ia kiba bun ki nongshongshnong ka thain bad kane kala ktah ia ka kamai kajih jong kiba bun ki longiing ba kin phah ia ki khun ba kin leit pule ia ka Higher Education ha Nongbah Shillong.
Ka dorkhas ka ong ruh ba ka Khat-ar Shnong kaba don haduh 40 tylli ki shnong bad ki nongshongshnong ba kot kumba 10,000 ngut, ka dei kawei na ki jaka ba sha kyndong eh jong ka Sohra Civil Sub-Division bad kaba hap hapoh u pud u sam jong ka Khat-ar Shnong-Laitkroh Block.
Ka dei ka thain ka bym biang ia ka surok bad bun na ki nongshongshnong ki shaniah ha ka rep synsar kum ka lad kamai. Ka dei ruh ka thain kaba don haduh 36 tylli ki skul Lower Primary, 14 tylli ki Upper Primary bad tang 2 tylli ki Secondary School lait noh ka Higher Secondary ka bym pat don haduh mynta.
Ka KSU ka ong ba ki samla pule kiba lah ban kyrshan na iing na sem ban bteng ia ka jingpule hadien ka SSLC ki lah ban leit sha ka jaka pule ha Mawrong lane ha kito ki jaka pule ba don ha Sohra hynrei ia ki bym lah ban kyrshan, kila hap ban sangeh noh ia ka jingpule.
