Shillong, Nailur 18 : Ka Khasi Students’ Union (KSU) ha ka sngi Nyngkong, kala phah tuklar ia u Symbud Myntri Rangbah ka Jylla ba khmih ia ka tnad PWD (Roads) Bah Prestone Tynsong, halor ka jingsniew shaba palat jong ka surok National Highway-6.
Ha ka dorkhas bala phah sha u Bah Prestone, u President ka KSU-EJH Streamly N Suchen ula ong ba kala iaid la jan hynriew taiew naduh ba ki Heh jong ka National Highway Authority of India (NHAI) kila kular ia ka seng ban sdang noh ha kaban maramor ia ka Natonal Highway hynrei kane ka surok ka dang long kaba sniew bad ka kam ruh kan dang ban sdang.
Ki thliew ki syar, ki jingorpait bad ka jingat jingthem ym tang ba kala pynsyllang ia ki nongleit nongwai hynrei kala wanrah ruh ia ka jingjulor jong ki kali bad lam ruh sha ki jingaksiden ba khah khah.
Ula ong ba kum ka surok kaba kongsan tam bad ba pyniasoh ia kiwei ki Jylla ka thain Shatei Lam Mihngi bad haba pyrkhat ia ka jingduhnong ka ban wan lada ym leh eiei noh, kala donkam palat ban pynbha ia ka surok NH-6 bad ban nang trei pynheh khnang ban pynthikna ia ka jingshngain bad ka jingaram jong ki paidbah ha ka leit ka wan.
“Halor kine ki jingsngewkhia, ka Seng ka kyrpad ia ka jingtuklar lem jong phi ha kaban pynsted wut wut ia ka kam nalor ka jinglum jingtip ia ki kam bala leh khnang ban lah pynbha noh ia ka surok NH-6” ong u samla Suchen ha ka dorkhas.
Ka KSU kala pan jingtip ruh kiba bniah halor ki kam bala thmu ban maramot ia ka surok, kynthup ka bor ban maramot, ban jingthmu ban siangrong biang bad kiwei kiwei ki sienjam kiban hap shim ha kaban pynbha ia ka surok NH-6.
La dawa ruh ia ka Sorkar ba kan ai ia ki jingtip haba iadei bad ka jingmang tyngka bala ai sha ka NH-6 bad ka jingpyndonkam ia kane ka song pisa ha ka ban maramot bad trei pynbha.
Ula ong ruh ba ka seng kan ai jingiaroh shikatdei eh ia ka Sorkar lad aka lah ban pyntip ia ka por bala buh ha kaban pyndep noh ia ka jingtrei ban maramot ban pynbha ia kane ka surok.
Ha kajuh ka por, ka KSU-EJH kala dawa ruh ia ka Sorkar Jylla ba kan mynjur lem ia ka jingdonkam kyrkieh ban don ka Traffic Branch ha East Jaintia Hills District.
