Shillong, Jylliew 29 : Ka Hynñiewtrep Border Disputes Redressal Forum (HBDRF) ha ka sngi Thohdieng, kala phah tuklar ha u Myntri Rangbah ka Jylla Conrad K Sangma halor ka jingjia ba dang shen kaba mih na ka jingiakajia pud hapdeng ka Assam bad Meghalaya ha ka shnong Lapangap, West Jaintia Hills District.
Kat kum ka dorkhas bala aiti da ka Forum, ka Karbi Anglong Autonomous Council (KAAC) kala thungdieng ha ka shnong Lapangap, Block-I, khlem ka jingiasyllok bad ki Khlieh Synshar Shnong myn ha ka 10 tarik Jylliew, 2025. Ia ka jingujor la buh ha ka Ophis u Deputy Commissioner ka West Jaintia Hills District.
Ia ka jingialang la pynlong ha ka 19 tarik Jylliew, 2025 hapdeng u DC/SP ka West Karbi Anglong bad West Jaintia Hills District ha IB Khanduli, ha kaba larai ban pynneh ia ka shongsuk shongsain bad ban pynsangeh ia ka prokram thung dieng. Hynrei, na Assam kila pynkhein ia kane ka jingiateh kular bad pynbteng ia ka jingthung dieng khlem da iasyllok ia ki Nongialam Shnong.
Ha ka 25 tarik Jylliew, 2025, la pynlong ia ka jingialang bad ki nongshongshnong ka Lapangap, Sengbhalang bad ki bor District na baroh arliang.
Ki Nongshongshnong bad ki Sengbhalang kila jynrat ia ki dieng bala thung da ka Assam khlem ka jingioh jingbit. Ka jingia nia kala mih hapdeng ki Karbi bad ki Pnar kaba lam sha ka jingpyndonkam ia ki kyntien kiba khor, jingiasiat jri bad kawang maw. Ki Pulit ka Assam kila siat da ki tyndong lyer pynsat khmat, kaba lam sha ka jingmynsaw hapdeng ki paid Pnar.
La kynnoh ruh ba ki paid Karbi kila pynjulor bat hang ia ki lyngkha kba jong ki paid Pnar ha kane hi kajuh ka sngi.
Ha ka 26 tarik Jylliew, 2025, ki Pulit ka Assam kila wan trui, bad kerkut ia ka jaka bad pyrshang ruh ban shna ia ka ktem.
Ka HBDRF ka kyntu ia ka Sorkar Jylla ban buh ia bun ngut ki Pulit/SF ha ka thain na ka bynta ka jingshngain bad ban khang ia ki Pulit ka Assam ba kin shna ktem ha ka thain.
Kala kyntu ruh ia baroh arngut ki Myntri Rangbah ka Assam bad Meghalaya ba kin leit iuhkjat ha ka thain ban pynthikna ia ka jingshngain bad ban wanrah ia ka jingsuk.
Ka Forum ka pynpaw ia ka jingsngew sheptieng ba lada ailad ia ki Pulit Assam ban shna ktem, kan buh ha ka jingma ia ka jingim jongki paidbah Pnar bad kan sa buh jingeh ruh ban weng pat ia ki lashai lashisngi.
 ha ka sngi Thohdieng, kala phah tuklar ha u Myntri Rangbah ka Jylla Conrad K Sangma halor ka jingjia ba dang shen kaba mih na ka jingiakajia pud hapdeng ka Assam bad Meghalaya ha ka shnong Lapangap, West Jaintia Hills District.){kind=link}