Shillong, Nailur 29 : Ka Hynniewtrep Achick National Movement (HANM) hynne ka sngi palei, kala iakynduh ia u Myntri kam Pohiing ka Jylla ma Lahkmen Rymbui ban pyntip bad phah tuklar ia ka jingiai pyndik jong ki shipai Border Security Force (BSF) ia ki paidbah ba sah ha ka thain Muktapur, West Jaintia Hills District.
U President ka HANM-War Jaintia Circle Shaniahlang Sucher ula ong ba ki shipai BSF ki dang iai pyndik beit ia ki paidbah Pnar ha ka thain khamtam ia ki Nongrep kiba hap ban leit rep leit riang sha ki jaka rep ba don hajan ka khappud bad ka Bangladesh.
Une u Nongialam ka HANM ula kynnoh wat ki nongbylla sngi kila shah pyndik manla ka sngi ha ki shipai BSF, kiba la pynlong ia ki talasi ia ki kali ba kit ia ki mar ba donkam ha ka trei ka ktah.
“Kane ka jingleh baheh jong ki shipai BSF ia ki paidbah ha ka thain Muktapur kala pynsyier ia ki paidbah khamtam ia kito kiba hap ban mih nala iing ban wad kam wad jam ha ki shnong ki thaw jong ka thain” ula ong.
Ha kajuh ka por, u President ka HANM Bah Lamphrang Kharbani ula kynnoh ba kane kam dei satia ka sien ba nyngkong ba ki paidbah ba sah ha Khappud kin shah pyndik ha ki shipai BSF..Namar kata kala dei ka por ia ka Sorkar Jylla ban shimkhia ha kaban iakren pynbeit ia kane ka kam bad ki bor ba halor jong ki BSF.
U Bah Lamphrang ula ong ba ha ka jingiakynduh, ka HANM kala kyntu ia u Myntri Kam Pohiing ban iakren bad ki shipai BSF ba kin pynsangeh ia ka jingpyndik ia ki paidbah ka Muktapur bad ki shnong ba marjan namar kane kan nang pyntieng pynsyier ia ki paidbah ka thain.
“Ki paidbah ha khappud ki sngewnguh ia ki shipai BSF kiba dei ban ai ka jingiada bad jingshngain bad ban khanglad ia ka jingwan rung jong ki nong Bangladesh sha Meghalaya hynrei kim lah shah satia ia ki jingshah pyndik..Namar kata, ngi la kyntu ia u Myntri kam Pohiing ban pynbeit ia kane ka kam hapoh ka artaiew lem kumta kan pynbor ia ka HANM ban shim ia ka ain hala ki jong ki kti” ong u Bah Lamphrang.
Haba kylli la ka don kano kano ka jingkular na u Myntri Kam Pohiing, u Bah Lahphrang ula pyntip ba shuwa ka jingialang, u Myntri ia u Inspector General ka BSF ban pan jingpynshai halor ki jingkynnoh bad ula bthah ruh ia u IG ba un pynbeit ia kane ka kam bad ki shipai jong u.
