Nongpoh, Jymmang 12 : U Deputy Commissioner ka Ri-Bhoi District Arpit Upadhyaya, ula hukum ia ka Tnad Fisheries ba kan tohkit halor ka jingpyniap pathar ia ki dohum dohwah ha Wah Khri, Western Ri-Bhoi bad bthah ruh ia ki Pulit ba kin thwet bad kem ia ki briew kiba donkti.
Kane ka hukum kala mih hadien katto katne kynta na ka jingsaphriang ka khubor halor ka jingshoh doh da ki riew rhah ha Wahkhri Synnia kaba don ha ka thain Mawdem, Ri-Bhoi kaba haduh u kha khla ba 80 kilo ula iap nalor bun bah ki kha khla bad kiwei kiwei ki jait dohkha kynthup ki khasaw bad khalad ba ju khot ha ka ktien nongwei ki Mahseer.
“Nga la bthah ia ka Tnad Fisheries ba kan tohkit marmar ia kane ka jingjia bad ban aiti ia ka kaiphod khlem ka jingpynslem sha nga” ong u Upadhyaya haba iakren bad Ka Shlem.
U iathuh ba ia ki Pulit ruh la bthah ba kin pynlong ia ka jingtohkit bad ban thwet ia ki briew kiba donkti. La bthah ba ki dei ban kem bad ban pynshitom ia ki kat kum ki kyndon ka Ain.
Ha ka jingtohkit, ki Pulit kila lap ksai ba ki briew kiba donkti ban pyniap pathar ia kine ki dohkha ha Wahkri ki dei kiba na ka thain Mairang. Kine ki briew kila pyniap ia kine ki dohkha da kaba shoh da u kharu.
U Upadhyaya ula ong “Kum u khlieh duh ka District nga dap da ka jingsngewkhia kaba jur ban sakhi ïa kum kine ki jingleh dusmon ïa ki wah khamtam ka jing pyniap dusmon ïa ki dohum dohwah”.
“Watla ngi ki bor pyniaid district ngi la pynjari ïa ka kyndon aiñ 144CrPc ban khang ne mana pyrshah ïa ka jingpyniap dusmon ïa ki dohum dohwah la ka dei da ki dawai bih, pynbthei bom ne kiwei kiwei ki kam kiba pynsniew ïa ki wah, hynrei la iohi ba ki briew kim patiaw ne burom atia ïa kane ka kyndon aiñ” ula bynrap.
Une u Khliehduh ka District ula ong ba dei ban kem ia ki briew kiba leh ia kum kane ka jait kam bad ba dei ban ai ka jing pynshitom ia ki kat kum ki kyndon ain kiba tyngeh.
