Shillong, Nailur 17: Ka Tnad Pulit kala bthah ia ki Superintendent of Police (SP) jong baroh ki District ka Ri-lum Khasi bad Jaintia ba kin pynlong ia ka jingtohkit halor ka jingsam shithi dawa pisa jong ka seng Hynniewtrep National Liberation Council (HNLC) sha ki nongkhaii bad hehspah.
Haba pyntip ia kane, uwei u Heh Pulit bym kwah pynpaw kyrteng ula ong “Ngi la bthah ia baroh ki SP ba kin tohkit ia ka jingkam ba ioh pdiang shithi dawa pisa da ki katto katne ki briew na kylleng ki District kiba hap hapoh ka Eastern Range”
“Shisien bala pynthikna, ki SP kin sa register case bad pynlong ia ka jingtohkit kaba thikna”ula bynrap.
Haba kylli, une u Heh Pulit ula ong “Ngim pat ioh satia da ki jingthoh hynrei ngi la ioh copy ia ki shithi dawa pisa tangba ym pat don mano manor uh ba nud ban kren (kumba ju long). Ta ka daw ngi la bthah ia ki SP ka Eastern Range ba kin tohkit. Shisien bala pynthikna, ngin sa leh ia kaei kaba donkam”.
Ula ong ba ki Pulit kim pynshlur satia ia ki paidbah ban noh synniang sha ka seng kaba la khein beain bad lada ki noh synniang, kane ka seng kan sa nang khlain bad kan sa nang pynkha ia ki huri hura baroh.
“Kaba ar, shisien bala pynshisha ba ki don ki shithi dawa pisa, ngin sa register case bad ka jingtohkit kaba bniah kan sa iaid. Lada ki lanot, ki synniang pisa, ki ruh kin sa ngat ha ki kyndon jong ka ain bad ngat ha ki jingpynsajia” ong une u Heh Pulit haba maham tyngeh.
Ka HNLC kala pyndonkam ia kajuh ka buit ban phah shithi dawa pisa sha ki briew lyngba ka Whatsapp.
“Ka jingiakren ( hapdeng ka HNLC bad ki lanot) ka dei beit tang lyngba ka whatsapp. Satang lada ki lanot ki wan shakhmat, kan long kaba eh ia ngi ban tip mano ba ioh pdiang ia ki shithi dawa bad kumno ki leh ia ka. Ngi hi ngim lah ong eiei hynrei ngi dang wad bad ngi wad kylli ia ki briew” ula ong haba bynrap “Ngi la don ki briew kiba suba, ngi la peit pyrman ia ki. Lada ngi ioh sakhi, kine ki briew ba suba kin dei kiba nyngkong ba kin rah tohkit bad ban pynsajia”.
Haba kyntu ia ki lanot ba kin ujor pyrshah ia kine ki kam beian, une u Heh Pulit ula ong “Ki lanot ki dei ban wan shakhmat namar tang lada ki leh kumne ngin sa lah ban iarap ia ki lem kumta kin ym lah leh eiei satia. Ki don shibun ki lynti ban phah ia ki shithi dawa pisa sha ngi kaba long sop sop. Ki briew ki dei ban wan shakhmat khnang ba ngin lah iarap”.
“Ha ki por bala leit noh, ngi la lah ban tuklar bad ioh kem ia kine ki briew, kiba leit lum ia ka pisa ba dawa ha Ri-Bhoi bad kiwei kiwei ki jaka-kane ka dei namar katto katne ki nongshah dawa kila wan shakhmat. Mynta ruh, ngi dang ap ia kum kane ka jingiatreilang bad jingkyrshan. Nga kyrmen ba ha ki sngi ban sa wan, ki briew kin sa wan shakhmat” ula bynrap.
 jong baroh ki District ka Ri-lum Khasi bad Jaintia ba kin pynlong ia ka jingtohkit halor ka jingsam shithi dawa pisa jong ka seng Hynniewtrep National Liberation Council (HNLC) sha ki nongkhaii bad hehspah.){kind=link}