Shillong, Nohprah 08 : Ka Sorkar Jylla kala bthah iaki bor District ban leit pynshisha ia ka jingkam ba twa ka par dewiong bad ka jingshah tep im lai ngut ki nongbylla ha kane ka par ba tih thliew khnai ha ka shnong Thangskai.
Haba iakren bad ki lad pathai khubor ha ka sngi Nyngkong, u Symbud Myntri Rangbah ba khmih ia ka kam Pohiing (Police) Bah Prestone Tynsong ula pyntip ba ka Sorkar kan dang ban ioh ia kano kano ka khubor halor kane ka jingjia.
“Ngim pat ioh khubor eiei ia mynta, ha ka jingshisha, nga la dep bthah ia ki bor district ka East Jaintia Hills ba kin wad la ka dei kaba shisha ne em. Hynrei ia mynta, ngin dang ban ioh ksai halor kane” ong u Bah Tynsong.
Kane ka jingkren u Symbud Myntri Rangbah kala mih hadien ka jingkynnoh da ka BJP Meghalaya halor ka jingdon ka jingtih dewiong beain ha ka Jylla. U Bah Prestone ula kular ba ka Sorkar kala leh ia ki kam ban tehlakam ia ka jingtih dewiong beain bad kala shimkhia bha ban leh eiei ia kane ka kam.
U Bah Prestone ula kubur ia ki jingeh ban iakhun pyrshah ia ka jingtih dewiong beain da kaba ong ba bun ki par ki dei kiba don sha ki jaka ba kyndong bha. “Hooid, ki don ki jingeh namar ki jaka kiba ngi hap ban leit, phim lah ban mutdur, kam don lynti iaid. Phi hap ban shu iaid kjat, kan shimpor ia phi ym duna ia ka san kynta, hynriew kynta nalor ka jinghap ban hiar ia ka riat ka ram” ula ong.
U Symbud Myntri Rangbah ula ban jur ba ka Sorkar kala pyrshang katba lah ban khang ia ka jingtih dewiong beain bad la bthah ia ki bor District ba kin shimkhia bha ia kane ka kam.
