Shillong Jylliew 26: U Symbud Myntri Rangbah ka jylla ba khmih ia ka kam pohiing Bah Prestone Tynsong uba pyntip ba ka sorkar jylla ka la phah tohkit ia ka jingjia hynnin ka miet Sngi U Blei ha Umsyiem halor ka huri hura hapdeng ki shiai BSF bad ki riew paidbah, kaba poi sha u pud ba ki BSF ki hap siat da ki ktang suloi sha suin ban pyntieng ia u paidbah.
Haba iakren bad ki nongthoh khubor u Bah Prestone ula ong, ba yn phah tohkit bniah ha ka kynhun tohkit halor ka jingjia ha Umsyiem halor ka jinghuri hura kaba la mih hapdeng ki BSF bad ki paidbah.
Ula iathuh, ba kila don 4 ngut kiba mynsaw ha kane ka jinghuri hura kaba kynthup 2 ngut ia ki riewpaidbah bad 2 ngut ki shipai BSF ha kaba la ialam ia ki ban ioh jingsumar ha Dawki PHC bad hadien kane kila ioh ban leit phai noh sha la iing.
“Ia mynta nga dang ap iaka kaiphod kaba pura hynrei na kaei kaba nga sngewthuh ka long ba ki BSF kila bat ia ar tylli ki kali kiba kit ia ki jaiñ bad la ialam iaki shapoh ka ktem jong ki BSF, hynrei u nongniah bad u nongbud jong kine ki kali kila ioh ban phet krad noh. Hadien katto katne por, kawei ka kali riewpaidbah kala leit sha ka ktem ki BSF bad haba ki BSF kila mih ban iakren kala mih ka jingiania hapdeng kine ki arliang mamla” ong u Bah Prestone.
U Bah Prestone ula iathuh b aula dep bthah ia ki heh pulit ka District ban peitngor halor katei ka jingjia bad mynta ki pulit ki dang ap iaka ejahar kaban ujor da ki paidbah ne ki BSF.
U Myntri Kam Pohiing ula ong ba ia mynta ym pat lah ban ong eiei ne ban pynthikna ia kane ka jingkam jong ki BSF hynrei shen yn lum ia ka jingialang bad u IG ka BSF ba nangne shakhmat kadei ban don ka jingiatreilang hapdeng ki pulit bad ki BSF haba ki pynlong ia kano kano ka jingkhynra.
Pule ruh: Dei ki Nongkhaii be-ain ba hiar thma ia ki BSF ha Umsyiem ban ioh khaii jain sha Bangladesh
