Shillong, Lber 07: U Myntri ka tnad Pule Puthi Rakkam A Sangma ula ialam lynti da ka nuksa ba ula phah skul ia ka khun da ka bos skul, ban pyni ia ki nong Shillong ba kin buh ka jingshaniah ha ki bos kala pynthied kyrpang da ka Sorkar.
Kane kala mih namar ka jingduna palat ki nong Shillong ban shim ia ka kabu ha kaban pyndonkam ia ki bos skul bala thied da ka Sorkar hapoh ka Sustainable Transport and Efficient Mobility Society (STEMS) programme ha u snem bala lah, ban kit ia ki Khynnah skul da ka thong ban lah pynduna ia ka jingdheng kali hapoh ka Nongbah.
Kum u Kpa uba don ka jingkitkhlieh, u Rakkam ula ong ba u ju leit ban on manla ka sngi iala ka khun haduh ka jaka ba wan shaw ka bos ba kan poi sha skul.
“(Kane ka dei) namar ba nga shaniah ha ka rukom pyniaid naba kine ki bos ki dei kiba la khmih da ki tracking system. Nga tip ka kine ki bos kila poi ne em sha skul bad katno baje kala wan phai pat. Ki don ki kor GPS ha kine ki bos. Kumta, nga shaniah ha ka rukom pyniaid” ula ong haba iakren bad ki nongthoh khubor.
Haba kylli, u Myntri ula ong ba ki briew ha ki jaka nongkyndong ki kham shaniah ia ki rukom pyniaid haba phah iala ki khun sha ki skul.
“Mynshuwa, ki Kmie Kpa jong ngi ki ju phah leit hi ia ngi sha skul hynrei ha kine ki sngi ba mynta khamtam ha sor, ki kmie kpa kila leit buh leit shaw hi iala ki khun na skul” ula ong haba bynrap ba kane ka jingleh ka donkam ia ka jingbuh briew bad don kali.
“Kumta, ka Sorkar kala pyntreikam ia ki bos skul bad ka jingthmu jong kane hi ka long ban pynduna ia ka jingdheng kali ruh. Ka dei ka rukom pyniaid kaba biang bha bad ki Kmie Kpa kim dei ban don jingartatien satia ia ka” ula ong.
