Shillong Risaw 30: Ka Meghalaya ASHA Workers Union hynne ka sngi Nyngkong kila pynbna ban phah shong jahthait ia baroh ki Nongtrei ASHA haduh ka 6 tarik u Naiwieng ban ap ia ka jubab ka ban ai da ka Sorkar hadien ka jingialang ba iakren ia ki ki mat jingdawa jong ki ASHA.
Ka Meghalaya ASHA Workers Union kala shim ia kane ka rai hadien ka jingiakynduh ia ka Myntri ka Koit ka Khiah ka Kong Ampareen Lyngdoh hapoh Secretariat.
“Ngi la dawa na ka Sorkar Jylla ba ka dei ban kyntiew noh ia ka jingsiew jong ki ASHA namar haduh mynta ngi dang ioh tang T.2000 shi bnai. Ka Myntri kam shym la lah ban ai kano kano ka jingkular halor kane ka jingdawa hynrei kala pyntip ba u Myntri Rangbah ka jylla yn sa lum ia ka jingialang ha ka 6 tarik Naiwieng bad yn sa ai ia ka jubab ha katei ka sngi” ong ka President jong ka MAWU Kong Mira June Myrshing.
“Namar ngin ioh ia ka jubab ha ka 6 tarik kumta kum ka President nga pynbna sha baroh ki dkhot ba kin shong jahthait hala iing bad ban ap ia ka jubab kaban ioh na ka sorkar ” ong ka Kong Mira.
Ha kaba iadei bad ka jingshah wengkam ki nongtrei ASHA, ka Adviser jongka Meghalaya ASHA Workers Union ka Kong Sony Kharjana kala ong, ba ki Rangbah Shnong kim donbor ban weng kam kynsan ia ki ASHA.
Kala pyntip ba ka seng ka la dawa na ka Myntri ba ka Sorkar ka dei ban thaw noh da ka polisi treikam halor kane ka bynta ia kaba ka Myntri kala pyntip ba ka sorkar kan sa thaw noh da ki Guidelines ne kyndon treikam.
Ka Kong Mira June kala pynpaw ia ka jingsngewnguh ia ka Myntri kaba la shimkhia iaka jingdawa ha kaba iadei bad ka jingioh jingsumar ki nongtrei ASHA ha ka jylla.
“Ngi pynpaw ka jingsngewnguh ia ka Kong Ampareen kaba la pyntip sha ka Union ba baroh ki nongtrei ASHA kin ioh jingsumar ei lyngba ka MHIS Card ha kaba kin ym donkam ban siew eiei nalade haba ki phah sumar ha kano kano ka hospital” ong ka Kong Sony Kharjana.
