Shillong, Risaw 20 : Ka Iingkashari Meghalaya High Court hynne ka sngi Palei kala hukum ban pynsangeh shu shipor ia baroh ki jingtei kiba don harud ka Pung Umiam tad haduh ba ka Khasi Hills Autonomous District Council (KHADC) bad ka Meghalaya State Pollution Control Board (MSPCB) kila wanrah ia ka kaiphod kaba kham bniah la ka long ne em ban shah pyndep ia kine ki jingtei.
Haba shong bishar ia ka PIL halor ka jingkhuid ka Pung Umiam, ka Division Bench kala ong “Ki jingpyntrei ia baroh ki jingtei harud ka Pung Umiam ki dei ban hap pynsangeh shuwa tad haduh da ioh ia ka kaiphod ba kham bniah n aka KHADC bad ka MSPCB”.
Kane ka hukum kala mih hadien ba ka KHADC kala ai ia ka kaiphod ba pynpaw ba ka jingshem jong ka Joint Inspection bad ka PCB myn ha ka 5-6 tarik Nailur, kala pyntip ba ki don haduh 7 tylli ki jingtei kiba don hapoh ka 300 meter na ka jaka ba kot ka um ynda shlei um pura ka Pung Umiam.
Kibe bun na kine ki jingtei ki dei kiba dang pyntrei bad ki bym pat pyndep satia.
Kine ki kynthup ia ka M/s Hills Cafe kaba shna ia ka restaurant hapoh ka 280 m na jaka ba kot ka um ynda shlei ka pung, ka M/s Megha Automative LLP kaba shna ia ka karkhana hapoh ka 280 m, ka M/s Moon View Café kaba don hapoh ka80 m, ka M/s SL Rokland Motors LLP kaba shna ia ka karkhana shna kali ba don hapoh 300 m, ka M/s Ever Banalari Guest House bad Restaurantkaba don hapoh ka 240m, ka M/s Highland Toyota kaba don hapoh ka 280m bad ka M/s Oriental Star Luxury Hotel bad Resort kaba don hapoh ka 260m na ka jaka ba kot ka um ynda shlei ka pung.
Kat kum ka jingpyntip ka KHADC, kine ki jingtei ki dei kiba la ioh ia ki kynja jingbit na ki bor shnong ba kin shna ia kine ki jingtei.
Ki don ruh ki jingtei kiba la ioh ia ki jingbit na ka PCB hynrei ym shym la paw pat ba ka don ka jingpyntreikam ia ka Ain haba iadei bad ka jingpynheh ia ka jingtei, ka rukom tei lane ka jingbuh da ka kyndon ia ka jingtei.
Namar kane, ka Iingkashari kala bthah ia ka KHADC bad ka PCB ban leit jurip ia manla ki jingtei ban pynthikna la ki long kiba ibit ne em ban shah pyntrei ia ki haduh ban da dep, khamtam haba buh hakhmat ia ka jingiajan jong ki sha ka jaka ba kot ka um ynda shlei ka pung.
Haba iadei pat bad ki jingtei kiba la dep, ka Iingkasahri ka ong ba ailad ia ka KHADC bad ka PCB ba kin pynpaw la ki don ne em ki bynta jong ki jingtei kiba donkam ban pynpra noh lane kiei ki kyndon pyrkhing ba dei ban bud na ka bynta ban pynbteng biang ia ka jingtei.
Ki bor khmih ki dei ruh ban buh ha ka jingmut jingpyrkhat ba ka jingiajan jong kino kino ki jingtei sha ka Pung, ka kyndon ba pyrrkhing ka dei ban don, kala ong haba bynrap b aka jingjurip ban pynlong da ka KHADC bad ka PCB kan iaid dakaba buh hakhmat ia ka jingmyntoi u paidbah babun balang ym ban iapein bad ka jingkhuid jong ka um.
Ka Iingkashari ka ong ruh, ka jingitynnad jong kane ka pung ka dei ban don ha ka jingmut jingpyrkhat ban ba buh hakhmat ia ka jingiohnong jong kine ki jingtei.
Haba iadei bad ki dukan synduk nar kiba la pynieng ha View Point, kaba thmu ban pynlong kum ki jaka die marbam, die jhur, bad kiwei kiwei, ka Iingkashari kala hukum ia ka KHADC, PCB, ka Tnad ka Koit ka Khiah bad ka Tnad Jngohkai ba kin khmih ia ka jingidonkam jong kine ki dukan synduk nar bad lada long kaba lah ban weng noh ia ki khnang ba kan ym ktah ia ka jingitynnad jong kane ka jaka peitkai bad ba kan lait na ka jingpynjaboh.
Ka Iingkashari ka sngew ruh ba ia kine ki juh ki rule dei ban pyntreikam haba iadei bad ki hynriew tylli ki resort ba kynthup ia ka Orchid Lake Resort, Ri Shat Sngi Orchid Resort, La Nicholas Dei Da Kine Resort, Roinam Retreat ha Umbir, Ri Kynjai ha Umbir bad Cafe Umbir ha Umbir.
“Hynrei naba kine ki Resort ki dei kiba la treikam lah kham slem bad kam sngew shong hok ban shu khang noh ia ki kam pher watla kim shym la lah ban bud ia kino kino ki kyndon, ka KHADC bad ka PCB ki dei ban pyntreikam ia ki kyndon ba pyrrkhing halor ka jingbret niut, pyntuid jakhlia bad kiwei kiwei ki jaboh kiba mih na kine ki Resort ba ki dei ban iaid da ka jingstad saian haba pynkhuid ia ki khnang ba kan ym ktah ia ka mariang bad ka pung umiama” kala hukum.
Ka Iingkashari kala pynpaw ruh ia ka jingkyrmen ba ka KHADC ban pyntreikam ia kine ki juh ki rule iala ka jong ka Guest House kaba don rud jong ka Wah Umiam.
Ka Iingkashari kala buh ban shong bishar biang ia kane ka mukotduma ha ka 15 tarik u Naiwieng.
