Shillong Rymphang 26: Ka Sorkar Pdeng ka lah ban pynduh pyndam noh ia ki artylli ki Railway Projects kaba kynthup ia ka 22 Km Tetelia-Byrnihat bad ka 108 Km Byrnihat-Shillong namar ka jingpyrshah jong kiba bun balang kiba sheptieng ia ka jingwan rung kyrthep ki briew kiba nabar.
Ia kane la pynpaw da u Myntri Rangbah ka jylla Conrad K Sangma haba iakren bad ki nongthoh khubor ka jylla ha kaba ula pyntip ba ka sorkar pdeng kala phah pyn phai noh ia ka T.300 Klur na ka bynta ban thied jaka ban pyntreikam ia katei ka projek rel.
“Ka mat ka long ba ka sorkar pdeng kam lah ban ap baroh shi rta. Ngi lah dep ioh pdiang ia ka shithi na ka sorkar India ba phah pynphai noh ia ka pisa kaba la phah na ka bynta ka lynti rel ha Byrnihat bad Shillong. Kumta ia kine ki projek yn sa pynduh pyndam noh” ula ong.
“Ngam tharai ba kan don ka jingurlong ban ioh ia ka rel ha Shillong namar ba ka sorkar India kala pan noh ia ka pisa hynrei lada ka don ka jingioh jingkyrshan kaba wan na ka East Jaintia Hills, ngi lah ban pyniaid shakhmat bad ka projek hangtei” ong u Conrad haba bynrap “Ngi dang khmih bniah ruh lada ki don kino kino ki bynta ha ka jylla ia kaba ngin lah ban pyniasoh da ka lynti rel hynrei kadei pat ban don ia ka jingmynjur lang jong baroh bad ngin sa iaid shakhmat”.
Haba pyntip ba kumba T.300 Klur yn hap ban pynphai biang sha ka sorkar pdeng bad ula Conrad ula ong, “Hynrei kaba kham kongsan ka dei ka jingbhah ia ka jingshna lynti rel, ia kaba ngin ioh ia ka GST bad kiwei kiwei ki khajna kaba lah ban kot sha ka T.10,000 Klur, kane kan ym don bad ngi hynrei bad ka Railways Ministry hynrei ka pisa kaba la wan sha ngi ka dei na ka bynta ban thied jaka ia kaba ngi hap ban pynphai noh”.
U Conrad ula iathuh ba ka jingtyrwa kaba thymmai kadei ban pynpoi ia ka lynti rel haduh Khliehriat, East Jaintia Hills bad ka sorkar ka dang khmih bniah bha ia kane ka kam bad ka dang iakren ruh bad kiba bun balang.
Ula pynthikna da kaba ong “Ka long kaba suk. Ngin iaid shakhmat lyngba ka jingkyrshan kaba ngi ioh na ki paidbah ha kaba iadei bad kane ka bynta baroh, namar kadei kaei kaei kaba leh na ka bynta ki paidbah bad na ka bynta ka roi ka par, ia kaba ngi khmih lynti ba ki paidbah kin sngewthuh ha ba ngi iaid shaphrang. Ka jingpyniasoh ha ka leit ka wan ka long kaba kongsan bha ha kane ka pyrthei kaba mynta. Ngi lah pyrshang ban pynsngewthuh ia baroh. Hooid, kila don katto katne ki kynhun kiba la don ia la ka nongrim bad ngi burom ruh ia ka nongrim kaba ki ieng”.
Ula ong ba ka sorkar jylla ka don ia ka jingthmu ban pynlong ia ka jingialang paidbah halor kane ka mat.
“Ha ka jingshisha ngi lah iakren bad ki paidbah bad ngi lah don bunsien ki jingiakynduh ha ki kyrdan ki bapher bapher hynrei kumba nga lah ong, kaei kaba ngi lah ioh na ki jingialang bad ki prokram, ka long ba ki don bun kiba pyrshah bad kim shym la don kiba pdiang” ong u Conrad.
Halor ka jingkylli la ka sorkar ka don jingthmu ban pyniar ia ka lynti rel ha rilum Garo, u Conrad Sangma ula ong, “Ngi lah ban peit ia kata, hynrei tang lada ngi lah pat ban ioh ia ka jingmynjur na baroh lang”.
