Shillong, Naitung 06: Ka Khasi Hills Autonomous District Council (KHADC) hynne ka sngi balang, kala phah pynphai biang ia ka KHAD (Khasi Social Custom of Clan Administration) Bill, 2018, kaba khang ia ki bar jylla ban shim/ai jait Khasi, na ka bynta ban ioh wanrah noh da kaba thymmai.
“Ka Executive Committee (EC) kala pule bniah ia ka kaiphod jong ka Advisory Committee bad rai ba dei ban phah pynphai shuwa iaka KHAD (Khasi Social Custom of Clan Administration) Bill, 2018 bad ban bujli noh da kaba thymmai, ka ban don ia katto katne ki jingpynbeit, ki jingpynjabai kumba la ai jingmut” ong u CEM ka KHADC Bah Titosstarwell Chyne haba wanrah ia ka kaiphod halor kane ka Bill hynne ka sngi sdang jong ka Dorbar Lyiur.
“Namar kata, khnang ba ka EC kan ioh ban wanrah ia ka KHAD (Khasi Social Custom of Clan Administration) Bill, 2022, dei ban phah pynphai noh shuwa ia ka KHAD (Khasi Social Custom of Clan Administration) Bill, 2018” u la ong.
U Bah Titos u pyntip ba ka EC kaba shong jingialang ha ka 7 tarik Lber, mynta u snem kala iakren bad mynjur ia ka kaiphod jong ka Advisory Committee halor kane ka kam ba iadei bad ka KHAD (Khasi Social Custom of Clan Administration) Bill, 2018.
Halor kane, ka EC ka sngew donkam ban phah ia ka copy jong ka Bill 2018 bad ka Bill 2022 bala pynkhreh da ka Advisory Committee sha baroh ki Dkhot, ia kaba la phah lyngba ka shithi ba 5 tarik Iaiong mynta u snem ba kin ai jingmut lem, ia kaba ki dkhot kim shym la ai jingmut eiei, ula bynrap.
Ka KHAD (Khasi Social Custom of Clan Administration) Bill, 2018 ka dei kaba la wanrah da ka KHADC ha ka Dorbar tlang ba long ha ka 20 tarik Naiwieng 2018 bad la mynjur ia ka ha ka 22 tarik Naiwieng, 2018. La phah ia kane ka Bill sha u Lat ka Jylla ban ai jingmynjur hynrei u Lat lyngba ka khubor ba 6 tarik Jymmang 2019, ula pynphai ia ka Bill ban shong pyrkhat biang.
Ka Bill 2018 kala kren shai ba uno uno u bar Jylla ba kam ialade kum u Khasi da kaba shim ia ka jait Khasi hapoh u pud u sam jong ka KHADC ban trei ban ktah ne ha ka khaii ka pateng, kin mad ia ka jingshong phatok ba 3 snem ha ryngkat bad ka kuna kaba T. 1 lak.
Kane ka Bill ka thmu ruh ban pynkupbor ia ki Seng Kur kiba la register bad ka KHADC ba kin ai ia ki Khasi Clan Certificate bad ong ba ym dei satia ban ai ia ka Khasi Tribe Certificate khlem da ioh shuwa ia ka Certificate naka Seng Kur.
