Shillong, Nailur 04 : U Symbud Myntri Rangbah ba khmih ia ka Tnad kam Pohiing (Police) Bah Prestone Tynsong ha ka sngi Nyngkong, ula pyntip ba ka Sorkar kala dep ban ai ktien sah ka seng Hynniewtrep National Liberation Council (HNLC) ba ka kwah ia u Chairman Bah Bobby Marwein bad u General Secretary Bah Sainkupar Nongtraw ba kin donlang ha ka jingialang iakren iasuk ka ban wan.
Haba iakren bad ki nongthoh khubor, u Bah Prestone ula ong ba ka rai mynta ka shong ha ka HNLC bad ka Sorkar ka apktien na ki ban pyniaid shakhmat bad ka jingiakren iasuk.
“Ngi dang apktien na ki (HNLC). Ngi la dep ban aiktien sha ki. Mynta ka rai ka shong ha ki” ula ong.
Haba kylli ba lano ka kylla ba-ar jong ka jingiakren iasuk kan long, u Bah Prestone ula ong “Ta ka daw ka Sorkar ka dang ai ia ka jubab na ki bad ban buh ia ka tarik. Ngi kwah eh ba ha ka sien shong jingialang ban wan, la kumno kumno ruh u Chairman lane u General Secretary ki dei ban iadonlang ha ka jingiakren”.
“Halor ka jingiakren iasuk bad ka HNLC hi, nga kwah ban pynthikna ia ki sha shisien, nga kwah ruh ban kyrpad ia baroh khamtam ki Nongialam ba halor ba kin sngewbha ban wan sahkhmat, ngi dang ap ia phi na ka Sorkar Jylla bad Sorkar Pdeng ban pynlong biang ia ka jingiakren kaba ngi kwah ban don” ula bynrap.
Kane ka jingkynthoh u Symbud Myntri Rangbah kala mih shisien hadien ba ka HNLC kala pynpaw ia ka jingpyrshah kaba jur halor ka jingkhot hajir ia u General Secretary Bah Sainkupar Nongtraw hapdeng ka jingiakren iasuk.
Ka HNLC kala dawa ruh ia ka Sorkar ban mynjur ha kaban map noh ia baroh ki kam bymman bala pynngat ia ki Nongialam lem kumta ka Seng ka lah ban weng noh ialade na ka jingiakren iasuk.
Haba kylli halor kane, u Bah Prestone ula ong ba ka notice khot hajir kam dei kaba khot da ka Sorkar hynrei ka dei tang ka kam ba ju leh da ka Iingkashari.
Kat kum ka jingong jong u, ka Judiciary bad ka Executive ki dei kiba iatrei hala ki jong ki jong ki kam.
“Nga tharai phi sngewthuh ia kane hynrei phi iohi ba ngi la shong ia ka jingialang iakren iasuk jong ka kylla ba nyngkong. Ka Sorkar Pdeng bad Sorkar Jylla kila kyrpad ia ki ban sngewbha pynsted noh ha kaban pyntip ia kiei ki ishu ba ki kwah ban iakren. Ngi dang ap ia kara” ula ong.
“Ha ka jingshisha, ka jingkyrpad jong nga ia ka HNLC sa shisien ka long ba kin shimkhia shisha ia ka kam, wan shakhmat, ngi dang ap ia ki bad ngin sa iakren pat. Kumba nga ong ha phi, kim dei ban khuhslai halor ka warrant bala ai da ka Iingkashari ne ka jingkhot hajir jong ka Iingkashari. Kane ka dei ka kam ba ju leh da ka Iingkashari” ula bynrap.
Halor ka jingdawa ka HNLC ban map noh ia ki kam bymman bala pynngat, u Symbud Myntri Rangbah ula ong “Ha ka kylla ba nyngkong jong ka jingiakren iasuk, ngi la iakren ia baroh kine ki ishu. Ngi la pynpaw ruh ba ngi kwah ban iakren bad ki Nongialam kiba hakhlieh duh ym tang u Vice Chairman. Lada ki shimkhia shisha, ka Sorkar Jylla bad Sorkar Pdeng ki da shimkhia shisha bad nga kyrpad ia ki ba kin aiktien ia ka rai jong ki lyngba u nongmihkhmat jong ki. Ngi long kiba la khreh ban nang iashong jingialang ha ki sngi ban wan”.
Haba kylli, u Bah Prestone ula ong “Ka kam bymman ka dei ka kam bymman. Ngam tip kaei kaba phi mut da kaba ong ki kam bymman ba shyrkhei (heinous). Ka kam bymman hi ka dei ka kam bymman kam pher la ka dei kaba heh ne kaba rit. Kan hap ban shah tynjuh ha ka Ain”.
“Kaei kaba nga ong ka long ba ka ain kan iaid hala ka jong ka lynti. Haba don ki kam bymman, ngi hap ban leh ia kata bad kam don lynti da kumwei pat”.
