Mynta yn wanphai iing haduh 85 ngut da ki bus bad liengsuin
Shillong, Jymmang 05 : Ka Sorkar Jylla hynne ka sngi Thohdieng, kala phah ia ka Kynhun bala khlieh da ka Myntri Sorkar Kong Ampareen Lyngdoh, sha Imphal ban iarap ia ki nong Meghalaya kiba sahkut ha Manipur ba kin wanphai noh shala Iing namar ka jingshyrkhei ka jingkulmar bad jingiaumsnam hapdeng ki jaidbynriew riewlum ha katei ka Jylla ka thain Shatei Lam Mihngi.
Kane ka Kynhun ka kynthup ia I Kong Ampareen Lyngdoh, Bah Daniel Thangkhiew, Politcal Secretary & OSD u Myntri Rangbah ka Jylla bad u Dr Vivekanda Singh Rathore, Superintendent of Police ka West Garo Hills. Kine kila leit mynta sha Imphal ban iarap ha kaban pynwan phai Iing ia ki Nong Meghalaya.
Kat kum ka kyrwoh na ka Sorkar Jylla, ka Sorkar kala wan ialam noh ia ki nongshongshnong ba sahkut ha Manipur kynthup ia 50 ngut ki samla pule na ka Agriculture University, 10 ngut ki samla pule na ka Food Techology Institute, 25 ngut ki dkhot ka kynhun ialehkai phutbol ka Lajong Sports Club bad kiwei kiwei.
Kat haduh hynne ka janmiet, palat 25 ngut ki nong Meghalaya kila don ha lynti sha Meghalaya lyngba ka Guwahati bad kine kila wan da ki liengsuin bapher bapher. Nalor ki liengsuin, palat 60 ngut ki samla pule kila wan da ki bos bala pynkhreh kyrpang ban wan sha Meghalaya.
Ka Sorkar Jylla ha ka jingiatreilang bad ka Prime Minister Officer, ka Ministry of Home Affairs, DG ka Assam Rifles, ka Ministry of Civil Aviation bad ki liengsuin shimet, kala shim ia baroh ki sienjam ba shngain ban pynthikna ia ka jingshngain jong ki nongshongshnong ka Jylla haba wan da kine ki liengsuin.
Haba kren halor ki sienjam bala shim da ka Sorkar Jylla, u Myntri Rangbah Conrad K Sangma ula ong “Ngi la wan ialam noh ia ki nongshongshnong ba sahkut lyngba ki liengsuin da ka jingioh jingbit kyrpang, kiba kwah ban wanphai sha Meghalaya.
U Conrad ula pyntip “Ia ka kynhun ialehkai ka Lajong la synran mynta sha ka Kad Liengsuin bad ngi la pyrshang kat kaba lah ban pynthikna ia ka jingshngain bad ka jingwanphai ha ka pork aba dei jong baroh ki nongshong shnong jong ngi”.
“Nga kwah ban kyntu ia ki samla pule ka Meghalaya kiba pule ha Manipur bad ki Kmie ki Kpa ba kim dei ban khih khuslai bad ban long kiba jai jai. Ngi la iatrei iajan bha bad ka Sorkar Pdeng bad ka Sorkar Jylla, ki bor pahara ban pynthikna ia ka jingpynbiang ia baroh ki jingdonkam ban wan phai iing suk ki samla pule jong ngi bad ki Nongshongshnong” ula bynrap.
Ha kajuh ka por, ka Sorkar Jylla kala pyllait paidbah ia u helpline number na ka bynta ki nongshongshnong kiba donkam ia ka jingiarap. Une u helpline number u dei 1800-345-3644 bad ki nongshongshnong ki lah ban phone ia kino kino ki jingiarap ba ki donkam.
Kumjuh ruh ki samla pule ka Agriculture bad Food Techology ki lah ban iakren bad u Nodal Officer Bah Remdor Dkhar (+91 98631 14387), Dr. Paul Chyne (9863089972), lah ruh ban phone ia kino kino ki jingtip ba iadei bad ki samla pule Doktor.
