Agartala, Nailur 24 :Ka iingbishar high court ka Tripura kala phah da ka jingthoh sha ka election commission of India (ECI), ka Tripura state election commission (SEC) bad ka Tripura Tribal Areas Autonomous District Council (TTAADC) halor ka jingkynnoh kaba iadei bad ka jingbym kynthup ia ki kyrteng jong ki jaidbynriew Bru kiba la sakma hapoh ka list jong ki nongthep vote ha Tripura ia kaba la pynmih na ka bynta ka jingpynlong ia ka village council election ka ban wan ha ka jylla.
Katkum ka jingiamynjur bad ka kynhun ki jaidbynriew Bru, ka sorkar Tripura kala dep lypa ban pynbiang ia ki jaka shong jaka sah na ka bynta ki 3332 ngut ki jaidbynriew Bru kiba la sakma ha ki shnong bapher bapher ha ka jylla.
Hynrei, watla katta kine ki jaidbynriw Bru kim shym la shah pynrung satia ha ka list jong ki nongthep vote ne ka electoral roll.
Katkum ka jingpynmih hukum kaba hashwa da ka Tripura high court, ka jylla kan pynlong ia ka village council elections ha ki jaka kiba hap hapoh ka TTAADC la kumno kumno ha une u bnai Naiwieng u ban wan.
Lah ban kdew ba kine ki jaka shong shnong bathymmai jong ki jaidbynriw Bru ka Tripura ki dei ruh kiba hap hapoh ki jaka jong ka TTAADC.
Kham hashwa, kata ha ka 16 tarik mynta u bnai, ia ka list jong ki nongthep vote na ka bynta ki 2634 ki constituency jong ki 587 tylli ki village committee la pynmih da ka Tripura SEC ha kaba kila don baroh 8,86,334 ngut ki nongthep vote, kata kaba kynthup ia ki 4,40,132 ngut ki nongthep vote kiba dei ki kynthei.
Hynrei, watla katta ia kine ki jaidbynriew Bru kiba la ioh ia ki jaka shong jaka sah bathymmai la kynnoh ba kim shym la shah kynthup satia, kata watla ia ki sienjam jong ka jingpynbiang jaka sah bad ka jingpynithuh la lah ban pyndep naduh kine ki ar snem kiba la dep.
Namar ka jingsngew buhkhoh halor kane ka jinglong jingman, kumta ruh na ka liang ka kynhun ki jaidbynriew Bru kila phah da ka jingujor sha ka iingbishar high court ka Tripura.
Haba pynsngew halor kane ka jingkyrpad ka jong ki, na ka liang u Justice Arindam Lodh jong ka Tripura high court ula phah da ka jingthoh sha kitei ki kynhun bad buh ruh ia ka tarik na ka bynta ban pynsngew halor kane ka phang ha ka 26 tarik mynta u bnai.
