Shillong, Nailar 11 : Ka Meghalaya High Court ka la pynphai biang ia ka kam kaba iadei bad ka synshar khadar ia ka Shnat Hima Nongwah Mawtamur sha ka Executive Committee jong ka KHADC, da kaba bthah ia ka Council ba kan pynmih ia ki hukum kiba biang hapoh ar bnai.
Ka rai jong ka ïingkashari ka dei kaba pynshong nongrim halor ka jingshisha ba ïa ka hukum ban pynbeit ïa ka jingpynbeit ba leh bakla ha u snem 2015 la soi da tang da uwei u Executive Member, katba ka Rule-31 jong ka The Assam and Meghalaya Autonomous Districts (Constitution of District Councils) Rules, 1951, ka kren shai ba donkam ban soi duna eh arngut ki Executive Member ia kano kano ka hukum jong ka Executive Committee.
Ka Nongmudui, Shnat Hima Nongwah Mawtamur, bala mihkhmat da u Sirdar, Bah Estansing Jana Nongbet, kala tynjuh pyrshah ia ka jingsynshar ia ka thain, kaba hap hapoh ka Sohiong Lyngdohship.
Kane ka thain ka dei kaba la pynhap kham hashuwa sha ka Jirang Syiemship namar ka jingpynbeit ba bakla bala leh ha u snem 2015 hynrei hadien la pynbeit da ka nongshah mudui lyngba ka hukum ba 13 tarik Nohprah, 2024.
Ka Iingkashari bala khlieh da u Justice HS Thangkhiew ha ka hukum ba pynmih ha ka sngi Nyngkong (11 tarik Nailar) ka sngew ba ka hukum ka dei ka bym iahap namar la soi ia ka tang da uwei u Executive Member.
Ka Iingkashari, namar kata, kala phah biang ia kane ka kam sha ka Executive Committee, haba bthah ba kan pynmih ia ki hukum kiba biang hapoh ka arbnai na ka sngi ba ioh pdiang ia ka hukum ka Iingkashari.
Haba pynwai ia ka mukotduma, ka Iingkashari kala bthah ruh ba dei ban pynneh ia ka status quo haba iadei bad ka jingsynshar ia ka Shnat Hima Nongwah Mawtamur tad haduh ba ka Executive Committee ka pynmih ia ki hukum ba donkam.
