Shillong, Iaiong 09 : Ka Sorkar Jylla kala pynkhreh ban siew khuit noh ia ki bill ba sahteng, kiba kot palat T.900 klur sha ki contractor kiba pyntrei ia ka skhim Jal Jeevan Mission (JJM) ha ka Jylla.
Haba pyntip ia kane ha ka sngi Palei, u Myntri ka Tnad Public Health Engineering (PHE) Marcuise N Marak ula ong “Ki bill ba sahteng jong ki contractor ba pyntrei ia ka JJM ki kot palat ia ka T.900 klur, hynrei ka kam ban siew noh ia ka pisa kan sa sdang noh shen hadien bala dep pyndep ia ki jingdonkam ba hap ban leh baroh”.
“Ngi la iasoi ia ka MoU ban pyntreikam ia ka JJM 2.0. Baroh ki project bala pyndep hapdeng 75 haduh 100% yn sa siew pisa noh shisien ba ka Ophis kala pyndep ia ki jingdonkam ba hap ban leh” ong u Marak haba bynrap ba ka Tnad kala leh shaid shaid ia ki kam kiba hap pyndep.
U Myntri ula batai ba ka jingslem ka jingsiew ka dei namar ka jinghap pyndep ia baroh ki kyndon bala buh da ka Ministry of Jal Shakti ka Sorkar India, kynthup ka jingpynbeit ryntih ia ki jingpynlut bad ka jingshna ia ka Sujal Gaon ID ia man kawei pa kawei ka project.
“Kito ki project kiba la pyndep 75 haduh 100 %, ka tnad kala dep ban leh ia ka jingpynbeit ia ki jingpynlut. Ka Sujal Gaon ID ka dang iaid mynta bad ngin sa pyndep noh shen” ong u Marak.
Halor ki jingkynnoh ba la siang ia ki pipe um khlem da pynpoi um, u Marak ula ong ba kane hi ka dei na ka daw jong ki tyllong um bad ka jingbym pat pyndep ia ka project, haba kular ba ka Sorkar kala shimkhia ia kane.
 ha ka Jylla.){kind=link}