Shillong, Iaiong 06 : Ki Pulit ka Jylla ha ka janmiet sngi Nyngkong, kila lap ia ka metiap jong ka Kynthei briew kaba jah naduh ka 20 tarik Lber, kaba la per ha ka wahduid kaba don ha khappud ka Shnong Nongrah bad Lapalang.
Ki nongshongshnong ka thain kila iohi nyngkong ia kane ka metiap kaba la song ha ka byrni bad mar mar kila pyntip sha ki bor shnong, kiba la pyntip pat sha ki Pulit ka Rynjah Police Station.
Ka kynhun ki Pulit ba kynthup ia ki Crime Scene Unit, kila poi sha katei ka wahduid bad kila lum ia ki sakhi satar hashuwa ban sei ia ka met.
U Superintendent of Police ka East Khasi Hills Bah Vivek Syiem uba la leit hi dalade sha katei ka jaka, ula pynthikna ba kane ka metiap ka dei jong ka kong Eilang Phawa ba na Lawjynriew, Nongthymmai, kaba dei shnong tai na West Jaintia Hills.
Kat kum ka jingong jong u, ki bahaiing kila pyntip ba kane ka kong kala jah na iing naduh ka 20 tarik Lber, 2026.
“Kane ka kynthei kala shah pyniap bad ki Pulit ki dang tohkit ban kem ia kito kiba donkti” ong u SP haba iakren bad ki nongthoh khubor ha katei ka jaka.
Ki Pulit kila register case halor kane ka jingjia bad kila pynlong ia ka jingtohkit ban lapdien ia ki briew kiba donkti.
