Shillong, Nailur 08 : U Lamphang ka Iingdorbar Thomas A Sangma ha ka sngi Nyngkong, ula pdiang ia ka shithi iehnohkam jong u Symbud Lamphang Timothy D Shira.
Namar kane, u Thomas ula pynlong ia ka jingialang ba kyrkieh jong ka Business Advisory Committee (BAC), kaba la rai ba ka elekshon sha ka shuki Symbud Lamphang kan long ha ka 12 tarik Nailur.
“Nga la ioh pdiang ia ka shithi iehnohkam na u Symbud Lamphang Timothy D Shira bad nga la pdiang ia ka. Nga la khot ruh ia ka jingialang ba kyrkieh jong ka BAC ban shim rai bad pynbeit thymmai ia ka calendar jong kane ka Dorbar Synrai khnang ba ngin lah ban jied ia u Symbud Lamphang ba thymmai. Ka BAC kala rai ba ka elekshon kan long ha ka sngi kut jong ka Dorbar Synrai” ong u Lamphang haba iakren bad ki nongthoh khubor hadien ka Dorbar.
Haba kylli halor ka daw ha lyndet ka jingiehnohkam u Shira, u Lamphang ula kdew ba u Shira ula pyntip b aula ioh pdiang ia ka jingbtheh na ka High Committee ka party ban hiar shuki.
U Lamphang ula kyntait ban kynthoh eiei palat ia kane halor kane ka kam da kaba ong ba ka shong ha ka rai jong ki nongialam ka party ban shim rai iano kin jied ban pynieng ha ka elekshon Symbud Lamphang.
