Shillong, K’lyngkot 18 :Ki nongialam ka UDP ha ka sngi balang kila pdiang sngewbha ia ki 5 ngut ki MLA kiba la wan pyniasoh sha kane ka seng riewlum hadien ba kila iehnohkam kum ki nongmihkhmat ka iing dorbar thawain ka jylla.
Kitei ki 5 ngut ki MLA kiba la resain noh ki kynthup ia u Bah Renikton Lyngdoh Tongkhar (Mawkyrwat) Bah PT Sawkmie (Mawlai), Bah Lambor Malngiang (Nongkrem), Bah Mayralborn Syiem (Nongpoh) bad u Bah Shitlang Pale (Sutnga-Saipung).
Ka UDP kala pynbna ruh ia kine ki 5 ngut ki MLA kum ki kyrtong ka Party ki ban mih aireng ha ka elekshon MLA-2023.
Ia kine ki 5 ngut la pdiang sngewbha da u President ka UDP bah Metbah Lyngdoh ha ryngkat ka jingdonlang ki nongialam ba kynthup ia u Bah Paul Lyngdoh, Bah TW Chyne bad kiwei kiwei. Hynrei na ka liang u Bah PT Sawkmie ym shim la lah ban wan sha ka jingialang namar ba don ba khlad ha iing.
Nalor kane la pdiang sngewbha ruh ia u Bah Arbor H Darnei uba long u MDC ka JHADC na ka seng NPP, uba la wan pyniasoh noh bad ka UDP.
Haba kren sha ki lad pathai khubor, u Bah Metbah ula pynpaw ba da ka jingwan iasoh kine ki MLA, ka UDP mynta kan don 12 ngut ki MLA baroh lang kiban iakhun ha kane ka elekshon MLA-2023.
Ula ong ba haduh mynta, ka UDP kala dep pynbna ia 40 ngut ki kyrtong ban mih aireng ha ka elekshon bad ka dang bishar sa ia ki 20 tylli ki constituency ha kaba shen kan sa pynmih ia ka thup kyrteng ba khatduh.
