Shillong, Nohprah 02 : Ka Directorate of Social Welfare ka Sorkar Jylla, hynne ka sngi Ba-ar, kala pdiang sngewbha ia ki 24 ngut ki Khynnah kiba la wan ialam shala iing na Chikkaballapur District, Karnataka.
Kine ki Khynnah kila wan poi suk ha Shillong bad la pdiang ia ki hapoh ka Ophis ka Directorate ha ka jingia donlang ki Ophisar bad ki Nongmihkhmat na ki seng ba khmih ia ka hok ki khynnah.
Ka Chairperson ka Meghalaya State Commission for Protection of Child Rights (SCPCR) Agatha K Sangma haba ai jingkren ha ka jingialang, kala ong ba ka jingwan phai iing jong kine ki Khynnah ka dei ka mat ba kongsan ha kane ka sngi. Kala pynpaw ia ka jingsngewnguh ia ki Tnad bad ki Agency ha Karnataka bad Meghalaya kiba la iatreilang ban pynthikna ba kine ki Khynnah kin poi suk bad hapdeng ka met ba koit ba khiah sha Jylla.
Ka Agatha kala pynpaw ia ka jingsngewkhia ia ka jingbun ki jingjia ba ialam ia ki khynnah shabar ka Jylla khlem da iaid kat kum ki lynti kiba dei. Kala pynkynmaw ia kum kane ka jingjia ha ki khyndiat bnai bala leit ha kaba la ialam ki Khynnah na Meghalaya khlem ka jingtip ki bor Sorkar.
Ka pyntip b aka SCPCR kala thoh sha u Myntri Rangbah ka Jylla ba ai jingmut ban thaw noh ia ka Standard Operating Procedure (SOP) halor ka jingmih ki khynnah ba hapoh 18 snem ban leit pule shabar ka Jylla. Kane ka jingai jingmut kala mih hadien ka jingialang bad ki Kynhun bapher bapher ia kaba la wan iashimbynta da ki Ophisar ka tnad Ain, Social Welfare, Education, Health bad ka Tnad Pulit.
Ka Agatha kala batai ba kane ka SOP kan pynthikna ia ka jingshai bad ka jingiatreilang da kaba ai jingtip shuwa sha ki District Child Protection Officer, pynbit pynbiang ia ki kot ki sla jong ki Khynnah bad ki skul kiban pdiang ia ki, ka jingpynshisha ia kine ki skul, ka jingmut kaba shai ia ki jingthmu bad ka por ban sah da kine ki khynnah, ka jingdonkam ban khmih bniah ia ka koit ka khiah jong ki shuwa ba kin mih leit jingleit bad kiwei kiwei. Kala ong b aka jingbym don kine ki lad peitngor kala lam sha kane ka jingialam ka bym iahap ba kan jia.
Ka Director ka Tnad Social Welfare, Camelia Doreen Lyngwa, kala pyntip ba ka Tnad kala ioh ia ka jingtip halor kane ka jingjia ha u bnai Nailar. Ka pyntip ba bun na kine ki Khynnah ki wan na ki longiing ba duna ka jingioh.
Ka kong Lyngwa ka bynta ba ki Kmie Kpa ki don ia ka jingkyrmen ban pynioh ia ki lad jingpule ba kham bha iala ki khun shabar ka Jylla, da kaba shaniah ba kin ioh ha ki jaka pule kiba shngain bad kiba pynbiang nadong hadong.
Hynrei ka ong b aka DCPO ka Chikkaballapur kala shem ba ka jaka ba pynsah ia kine ki Khynnah ka dei ka bym biang satia bad ka dei ruh ka bym pat register bad ka Sorkar Karnataka, kaba la pynsngewkhia shibun eh.
Ka ong ba ka technology kala shim ia ka bynta kaba kongsan bha ha ka liang ka jingiasam jingtip bad pynthikna ia ka jingwan phai suk jong kine ki khynnah sha Meghalaya.
