Shillong, Lber 08: Ka Meghalaya Bharatiya Janata Party (BJP) hynne ka sngi kala pdiang ia ka jingwan iasoh u nongialam bad MLA barim ka All India Trinamool Congress (TMC) na Salmanpara u Winnerson D Sangma uba la pynpaw ba kin sa da don kiwei ki MLA ka AITC ki ban iasoh shaka Party.
Ia u Winnerson la pdiang da u President ka BJP Meghalaya u Rukman G. Momin haka jingdon lang ki MLA ba kynthup u Bah AL Hek bad u Bah Sanbor Shullai, u chief spokesperson u Bah M Kharkrang nalor kiwei nongkitkam ka party.
Haba pynpaw ba kane ka jingwan iasoh u Winnerson kan ialam iaka BJP shaka jingjop na baroh 2 tylli ki Parliamentary Seat, u Bah Hek u la ong “Kiwei ki MLA barim bad ki MLA ba mynta kin sa rung shaka BJP bad mynta ngi dang ap iaka por kaba biang”.
Haba kylli katno ngut ki MLA ka TMC kin wan iasoh shaka BJP, u Bah Hek u la ong “Katno ngut kin wan, ap ban sa ia peit”.
Naka liang u MLA u Bah Sanbor Shullai haba jubab halor ka BJP kan pdiang ne em ia u nongialam ka TMC bad u Myntri Rangbah barim u Mukul Sangma.
“U Dr Mukul udei u nongialam sain pyrthei bala ih bha, Hapoh kane ka ophis ngin pdiang burom ia u lada u wan iasoh shaka BJP” u la ong.
Hashuwa kane u Winnerson ula ong ba um lah ban kren naka liang u Mukul Sangma bad naka liang ka rai jong u.
“Iaka rai jong u, ngam lah ban kren ma nga namar ka shong ha u, la un wan ne em shaka BJP. Kan dei ka rai jong u ka ban ialam lynti ia u bad haka kam sahkri paidbah” ula ong.
U MCS Officer barim u la ong ba ka jingwan iasoh jong u shaka BJP kadei namar ka jingthrang ban iai bteng ban shakri ia u paidbah haka rynsan kaba kham heh.
“Nga la don bynta haka sain hima naduh 2013. Nga la mih khmat iaka Salmanpara constituency kumba 10 snem naduh 2013 haduh 2023 hynrei mynta ka khlem ioh ka jingjop haka MLA ilekshon. Nga dang kwah ban don bynta haka Politics. Nga dang kwah ban shakri paidbah bad haba nga peit iaka jinglong jingman hapoh ka jylla nga sngew baka BJP kadei ka rynsan kaba kham heh hapoh ka Jylla bad National Level ban shakri iaki paidbah. Nga la rai ban rung shaka BJP bad nga ai khublei ia u State President bad iaki nongkitkam ka Meghalaya BJP kiba la pdiang ia nga. Ngan bteng ban shakri iaki paidbah jong ka Constituency bad ka Jylla baroh kawei” ula ong.
U la pynpaw ruh ka jingai khublei iaki nongialam ka TMC khamtam iaka National President ka Mamata Banerjee bad ia u General Secretary u Abhishek Banerjee bad ki nongialam ka Meghalaya TMC u Dr Mukul Sangma.
“Nga la rai ban mih noh naka Party bad nga kwah ban pyntip ba u Dr Mukul Sangma lem bad kiwei ki nongialam kila leh bha ia nga. Nga ai khublei ia baroh. Nga sngew ba ka BJP kala nang khlain bad ki paidbah ruh kila sdang ban pdiang iaka” ula ong.
U Winnerson ula kam ruh ba kin sa don kiwei ki nongialam ki ban rung shaka BJP haki sngi ban wan haka jingialam u Rikman Momin namar iaka BJP, ki paidbah kila pdiang ha Garo Hills.
“Ki paidbah kila sdang shaniah haka BJP bad dei namar kane ha ki sngi ban wan kin sa don ki ban rung shaka Party. Nga skhem jingmut baka hashuwa ka ilekshon MP kin sa don ki ban wan rung shaka Party naka bynta ban nang pynkhlain shuh shuh iaka Party BJP bad nga kyrmen ba daka jingpdiang ki paidbah, ka BJP ruh kan nang khlain shuh shuh hapoh ka Jylla” ula ong.
