Shillong, Nohprah 22: U Nongialam ka seng BJP bad MLA ka Pynthorumkhrah Bah AL Hek ula ai ka jingkyrshan ia ka rai ba dang shen jong ka Sorkar Pdeng ban pynbeit thymmai ia ka skhim Mahatma Gandhi National Rural Employment Guarantee Act (MGNREGA) haba pynpaw ia ka jingkongsan ban don ka jingiatreilang bad ban shim lang ia ka jingkitkhlieh hapdeng ka Sorkar Pdeng bad ki Sorkar Jylla ha kaba iadei bad ka jingbhah ia ka pisa.
Haba iakren bad ki nongthoh khubor hynne ka Sngi Nyngkong u Bah Hek ula ong, “Ngi don ia ka jingsngewkhia halor ka kam pynroi. Ka kyrteng kaba la mynshwa NREGA ka long kaba biang. Lada ka BJP ka kwah ban pynkylla ia ka kyrteng bad lada kadei kaba pdiang da baroh, kumta ngin ym don kano kano ka jingthud, namar ka thong ka jong ngi ka long ban pyniaid shakhmat ia ki kam pynroi. Ki paidbah ha Nongkyndong, khamtam kito kiba bat ia ki Job Card kiba na ki longiing baduk, kidei kiba la ioh lypa ia ka jingmyntoi bad mynta kin ioh shuh shuh ia ki sngi ban bylla”.
Ula bynrap ba ka jingpynkylla ia ka rukom bhah tyngka ka long 90:10 hapdeng ka sorkar pdeng bad sorkar jylla kadei kaba la pdiang, da kaba pynpaw ba ka jingiashimbynta lang jong ki jylla ka long kaba kongsan ban long ki trai ba shisha jong katei ka skhim.
“Wat ki jylla ruh kidei ban don lang ia ka jingkitkhlieh. Haba ngi wanrah ia kino kino ki kam pynroi ka jylla ruh kadei ban shim lang ia ka jingkitkhlieh. Haba ka sorkar pdeng bad ka sorkar jylla ki iatreilang kan don ka jingsngew ia ka jinglongtrai lang ia ka kam. Lada ka pisa ka wan thik tang na ka sorkar pdeng kumta kin kam ba kadei ka skhim kaba la bei tyngka da ka sorkar pdeng. Hynrei haba ka don ka jingpynlut lang ia ka pisa, kumta ngi lah ban ia shim lang ia ka jinglong trai ha kaban pyntreikam ia ka skhim” ula ong.
U Bah Hek ula pynpaw ba ka jingpyniar shuh shuh ia ki sngi ban bylla hapoh jong katei ka prokram kan ai jingmytnoi shuh shuh ia ki shnong ha ki thain nongkyndong kiba don ha kylleng jong ka ri India kynthup ia ka Meghalaya, kumta kane kan pynkhlain ia ka ioh ka kot bad ia ki jingtei ha ki thain nongkyndong.
 haba pynpaw ia ka jingkongsan ban don ka jingiatreilang bad ban shim lang ia ka jingkitkhlieh hapdeng ka Sorkar Pdeng bad ki Sorkar Jylla ha kaba iadei bad ka jingbhah ia ka pisa.){kind=link}