Nongpoh, Risaw 27: Hashwa ka jingrakhe jong ka Seng ki Salesians of Don Bosco ïa ka lyngkhuh snem ba 100 snem lane ka Centenary Celebration naduh ba ka kynhun Selesians of Don Bosco ki la wan ban iuh kjat sha kane ka thaiñ Lam Shatei Mihngi ka Ri India, mynta ka sngi ka Balang Catholic Nongpoh Parish ka la pdiang burom ïa ka jingwan jngoh u Rev. Fr. Angel Fernandez Artime, Rector Major ka Seng Selesian of Don Bosco u ba la wan ban iuhkjat ha ka sien kaba ar.
La pdiang burom ïa u Rector Major Seng Selesian of Don Bosco hashwa ba un leit sha Shillong, da u Phadar Rangbah ka Nongpoh Parish, u Fr. Peter Syiemlieh ha ka jingïadonlang ruh u Fr. Paul Olphndro Lyngkot, Provincial ka Shillong Province, ki phadar, ki sister bad ki nongïalam niam bad kynthup ruh ki khynnah skul bad ki khynnah skul barim ka St. Paul’s Higher Secondary School, Nongpoh.
Ka kynhun seng ki Salesian of Don Bosco kin rakhe ïa ka Centenary ha ka 30 tarik u Risaw, 2022 ha Cathedral Parish, Laitumkhrah ha Nongbah Shillong.
Haba ai jingkren ha kane ka jingjngoh ïa ka Nongpoh Parish, u Major Rector u Rev. Fr. Angel Fenandez Artime u la ai mynsiem ïa ka Parish Nongpoh hi baroh kawei kumjuh ïa ki shlem ai jingnang jingstad kiba la pynïaid da ki Salesians hashwa ka jingrakhe ka seng ki Salesians ïa ka jingdap 100 snem.
U la ai ruh ïa ki kyntien kyntu kynpham sha baroh ki nongkitkam, ki khynnah skul bad kiwei kiwei ba ki dei ban long kiba ïa tylli, ban ïa ieid iwei ïa iwei pat bad ruh ban treishitom khnang ba kin kiew ha ka jingim ka jong ki khamtam ban long ruh kiba tip briew tip blei ha ka jingim ka jong ki.
