Shillong, Jymmang 20 : Ka Iingkashari Meghalaya High Court kala pynksan ia ka hukum set along ba 10 snem ia u briew uba leh beijot ia ka khynnah 16 snem, kaba la paw pyrthei ym na ka ejahar sha ki Pulit hadien ka jingpom u pyrthat haduh arsien ia ka Iing kaba pyni ia ka jingleh bymman ha kane ka Longiing.
Ka Iingkashari Division Bench ka Chief Justice Revati Mohite Dere bad Justice W Diengdoh, ha ka 18 tarik Jymmang, kala kyntait ban pdiang ia ka jingkyrpad jong u Banteilang Sohshang, kaba pynskhem ia ka hukum ka Special POCSO Court ka West Khasi Hills, ban set along ia u hapoh ka kyndon 5(I)(n)/6 jong ka Protection of Children from Sexual Offences (POCSO) Act, 2012.
Kane ka Khynnah kaba dang don hapdeng 16 bad 17 snem, kala shah leh bymman bun sien hapdeng u bnai Lber bad Naitung 2016 katba ka dang sah ha ka iing ka kmienah, kaba une u nonglehbymman u sah. Ka khlem pyntip ia kane ka jingjia shano shano ruh namar u nongleh bymman ula byrngem ban pyniap ia ka.
Kane ka kam bymman kala paw pyrthei ha u bnai Jymmang 2016 da ka jingpom u pyrthat haduh arsien ia ka Iing.
Haba shimkhia ia ka rukom ngeit ki Khasi ba kum kine ki jingpom pyrthat ki pyni ia ki dak ba don ka jingleh bymman ha kane ka Iing, ka Kmie jong une u nongleh bymman kala khot ia ki bahaiing hasem bad une u briew ula phla ba ula leh beijot ia kane ka khynnah.
Ka Kmie une u brew kala pyntip sha ka kmienah kane ka khynnah, kaba la pyntip pat sha ka Kmie ia kaei kaba la jia. Ka kur kala lum ia ka jingialang ban iakren ia kane ka kam hynrei kam shym la lah ban shim ia kano kano ka ram, kaba la lam shaka jingujor ia ka ejahar.
Ka Iingkashari kala kyntait ia ka jingkam jong une u nongleh bymman ba ula leh ia kane ka kam da ka jingiamynjur lang. “Ka jingmynjur jong ka khynnah ka dei ka bym shong nongrim” ong ka Iingkasahri haba shikhia ba kane ka khynnah kala iai phla ba une u briew ula leh beijot jubot ia ka ha ka jingphla jong ka.
Ka Iingkashari nalor kata, kala pynpaw ba une u nongleh bymman u khlem phla ba dei ka jingmynjur lang ha ka jingbatai jong u ia kaei kaba jia hapoh ka kyndon 313 CrPC. Ka jingphla jong u sha ka Kmie bad ki bahaiing ruh, ka dei kaba la pynskhem da ki sakhi medical na u Dr WR Nongkhlaw ka Nongstoin Civil Hospital nalor ki jingphla jong kiba bun ki nongai sakhi- kynthup ka Kmie une u nongleh bymman, kaba la wan mih kumka prosecution witness.
Ka Iingkashari kala pynksan ia ka hukum ka Special POCSO Court ban siew bai lutksan ba T.50,000 sha kaneka khynnah bad ka jinglut jingsep ha ki jingsumar, ka ban siew da ka Meghalaya State Legal Service Authority.
La bthah ia ka District Legal Service Authority, West Khasi Hills, ba kan ai ia ka kaiphod bala pyntreikam ia ka hukum hapoh ka hynriew taiew. Ia kane ka kam la buh ban bishar biang ha ka 18 tarik Jylliew, 2026.
