Shillong, Naiwieng 20 : Ka Myntri Sorkar bad MLA ka Laitumkhrah Kong Ampareen Lyngdoh, kala paw mynta hakhmat eh ban long ka kyrtong jong ka National People’s Party (NPP) na Shillong Parliamentary Seat ha ka elekshon Lok Sabha ban long ha u snem ban wan.
Haba kylli da ki nongthoh khubor, ka Myntri kam shym la kyntait ne mynjur ia ka jingmih ki jingiakren ba kan dei ka kyrtong jong ka NPP hynrei kala pynpaw pat ia ka jinglong ba kloi bad bala khreh ban iakhun lada ka party ka ibit ia ka.
“Ka Party kan shim ia ka rai jong ka bad nga don beit hangne ban shakri ia ki paidbah ka Jylla” ong ka Kong Ampareen.
Ka NPP haduh mynta kan dang ban pynbna ia ki kyrtong kiban aireng ia ka elekshon Lok Sabha na baroh arseat-ka Shillong bad Tura Parliamentary Sear.
U President ka NPP Meghalaya bad Symbud Myntri Rangbah Bah Prestone Tynsong ula pyntip ba ka party kala ioh pdiang ia shibun ki jingkyrpad na ki briew ba pan ia ka ticket sha ka elekshon Lok Sabha. Ula pynthikna ruh ba ka party ka don jingthmu ban pynbna ia ki kyrtong ka party jong baroh arseat ha ka taiew ba khatduh jong u Naiwieng.
Nalor ka Kong Ampareen, ki laingut kiwei pat kiba la paw kyrteng ba kila pan ticket na ka NPP ki kynthup ia u MLA barim ka Mawsynram Bah Himalaya M Shangpliang, u MLA barim ka Mawhati Dasakhiat Lamare bad u MLA barim ka Umroi Bah George B Lyngdoh.
