Shillong, Jylliew 04 : Ka Liang Pyrshah Voice of the People Party (VPP) kan dang ban shim rai iano kan leit kyrshan ha Lok Sabha la kan dei ia ka kynhun synrop National Democratic Alliance (NDA) ba ialam da ka BJP ne ka INDIA Bloc.
“Kum ki nongialam ka Party, ngin sa iashong bad sa shim ia ka rai halor kane ka kam” ong u President ka VPP Bah Ardent M Basaiawmoit haba iakren bad ki nongthoh khubor hynne ka sngi Ba-ar hadien ba ka VPP kala ioh ia ka jingjop na Shillong Parliamentary constituency.
Haba pynpaw ba ka VPP kan pynsngew ia ki ishu kam bamsap ha Lok Sabha, ula ong “Ngin sab uh jingkylli ia ka Sorkar India, balei ba ym phah ED (Enforcement Directorate), CBI (Central Bureau of Investigation) sha Meghalaya haba don bun ki jingkynnoh bamsap hapoh ka Jylla”.
Nalor ka kam bamsap, ula ong ba ka jingiakhun jong ka party ka long pyrshah ia ka jingduh bad ka jingleh shiliang khmat.
Nalor kane, u Bah Ardent ula kular ba ka VPP kan buddien khlem shongthait bad ka Sorkar India halor ki ishu ba kala buh ha ka mat ialap elekshon.
“Ka ILP kan dei kawei ka ishu kaba la kynthup ha ka mat ialap elekshon jong ka party, ka article 371 ruh kadei kawei bad bun kiwei kiwiei. Ka party kan buddien khlem shongthait ia kine ki ishu, kiba la kdew ha ki mat ialap elekshon bad ka Sorkar India” ula ong.
