Shillong, Jylliew 04 : U President ka Voice of the People party (VPP) Bah Ardent M Basaiawmoit ula dawa ia ki Nongialam ka Sorkar Meghalaya Democratic Alliance (MDA) ba ialam da ka National People’s Party (NPP) ba kin hiar shuki noh na ka Sorkar hadien ka jingshah rem kput ha ka elekshon Lok Sabha na ki artylli ki Lok Sabha seat- Shillong bad Tura.
“Hooid, ka dei ka jingkylli kaba iahap. Lada ki Nongialam ka MDA ki dang don ka burom, ki dei ban shim ia ka jingkitkhlieh bad hiar shuki noh na ka Sorkar” ong u Bah Ardent haba iakren bad ki nongthoh khubor.
U kyrtong ka VPP Dr Ricky AJ Syngkon ula pynliem ia u MP ba lai samoi ka Congress Bah Vincent H Pala da palat 3.7 lak vote katba u Sangleng A Sangma jong ka Congress ula pynliem ia ka para u Myntri Rangbah ka Jylla ka Agatha K Sangma da palat 1.55 lak vote.
U Bah Ardent ula niew ruh ia kane ka jingjop kput jong ka party kum ka rai kaba shai kdar ba ki paidbah ka Jylla kila duh ia ka jingshaniah bad jingngeit ha ka Sorkar MDA.
“Ha kane nga por nga kwah ban ai khublei ia u Blei. Kane ka dei ka dak ba u Blei ula pynpaw haba ngi shaniah pura ha u bad kum ka Party, ngi da sngewkmen ia kane ka jingkyrshan ba radbah, ka jingshaniah ba ki paidbah kila ai ha ngi” ula ong.
Nalor kane, une u Nongialam ka VPP ula kam ba ka result ba mynta ka sngi ka kren jam bha halor ka jingshisha ba ka VPP kan sa mih pli ha ka jaka jong baroh ki seng riewlum ha Meghalaya.
“Kumba nga ong, ngi la iakhun pyrshah ia baroh ki seng sain pyrthei kiba don ha ka liang synshar namar ka jingmih jong ka VPP ruh ka dei halor ka nongrim ka jingbym lah shakri jong baroh ki seng sain pyrthei kynthup ki seng riewlum bad ngi ju kren bunsien ba shisien ka sngi, ka VPP kan sa bujli ia baroh ki seng riewlum, ia kaba ngi la leh mynta lyngba ka result ba phi la iohi mynta” ula ong.
Haba iaroh ia ka jingstad u paidbah, u Bah Ardent ula ong b aka result jong kane ka elekshon ka dei ka dak ba ym don mano mano ruh ba lah ban shu ialehkai ia u paidbah.
