Shillong, Risaw 09 :U Myntri kam Pohiing ka Ri u Amit Shah ula ong ba ym pat ju don satia ki Sorkar bala leit noh, kiba shimkhia ia ka roi ka par jong ki Jylla ka Thain Shatei Lam Mihngi ka Ri tad haduh ka jingwan ka Sorkar NDA ba ialam u Narendra Modi kum u Myntri Rangbah Duh ka Ri.
U Amit Shah ula kren ia kane haba pyniaid ia ka jingialang bah ba 70th jong ka North Eastern Council kaba long hynne ka sngi U Blei ha Guwahati, Assam bad kala la iashimbynta da baroh ki Lat bad ki Myntri Rangbah jong ki Jylla ka thain Shatei Lam Mihngi nalor ki Ophisar jong ki Tnad ka Sorkar Pdeng bad ki Sorkar Jylla.
“Ka roi ka par jong ka thain Shatei Lam Mihngi kam ju long satia ka kam ba hakhmat jong ki Sorkar bala leit noh. Hynrei, hapoh ka jingialam u Myntri Rangbah Duh u Narendra Modi, ka Sorkar India kala leh ia bun ki kam ha kine ki phra snem ban wanrah ia ka jingsuk, ban pynkhlain ia ki lad pyniasoh bad ban buh hakhmat ia ki kam pynroi jong ka thain” ong u Amit Shah haba ai jingkren.
U Myntri kam Pohiing ka Ri ula ong ba ki don haduh lai tylli ki jingeh kiba kah lynti ia ka roi ka par jong kane ka thain Shatei Lam Mihngi ka Ri ha kine ki phew snem bala leit noh bad kine ki dei ka jingiaumsnam bad ka jingpyntriem jong ki kynhun kiengatiar, ka jingbym biang ki lad pyniasoh naduh ki surok, ka lynti rel bad ka liengsuin lem bad ka jingbym don ba theh ia ki kam pynroi da ki sorkar bala leit noh.
U Amit Shah ula ong ba ka Ri India baroh kawei ka niew ia ka ktien ka thylliej, ka deiriti, ki jingbam bad ki riam ki beit jong ka thain Shatei Lam Mihngi ki dei ki matti sahnam bad ka Sorkar bala ialam da u Narendra Modi kala pyrshang katba lah ban iada bad kyntiew ia ka snap kyrpang jong kane ka thain.
“Ha kine ki phra snem, ka Sorkar kala pyrshang katba lah ban weng ia baroh ki jingeh jong ka thain Shatei Lam Mihngi da kaba wad ia ki daw tynrai” ula ong.
U Amit Shah ula kyntu ia ki Myntri Rangbah jong ki Jylla ka thain Shatei Lam Mihngi ban pyndonkam pura ia ki jingdon jong ki data ka North East Space Application Centre (NESAC) ban tehlakam ia ki jingshlei um, ka jingpynpoi um sha ki jaka rep, ka kam jngohkai, ka jingpynrben ia ki khlaw bad ka rep ka riang.
U Amit Shah ula ong ba ki Myntri Rangbah jong ki Jylla ka thain ki dei ban thung ia u Nodal Office sha NESAC hala ki jong ki Jylla khnang ba kin lah ban pyndonkam pura ia kane ka Tnad.
“Ka Sorkar u Narendra Modi ka ngeit ba baroh ki kam pynroi jong ka Ri kan wan tang lada niew burom lang kumjuh ia baroh ki jait ktien jong ka Ri bad kala buh ruh ia ka kyndon ha ka National Education Policy ba thymmai b aka Primary Education ka dei ban long da ka Ktien lajong” ula ong.
U Amit Shah ula ong ba ka ioh ka kot jong ka India kala don mynta ha ka kyrdan ba san hapoh ka Pyrthei bad ka long ba donkam ban kyntiew ia ka ioh ka kot jong ki Jylla ka thain Shatei Lam Mihngi khnang ba kan synniang lem ha kaban kyntiew noh sha ka kyrdan ba-ar ha ka pyrthei.
Haba kren halor ka jingtehlakam ia ka jingshlei um, u Amit Shah ula ong ba ka Sorkar u Modi kala shimkhia bha ia kane haba pynpaw ba ka jingthmu jong ki Hydro Power Plant ka long ym tang ban pynmih bording hynrei lah ruh ban pyndon kam ia ki kum ka jingiada ia ka jingshlei um. Ula ong ba ka jingpyndonkam ha ka rukom kaba dei ia ki 271 tylli ki jaka lang um (wetlands) ka lah ru ban iada ia ka jingshlei um.
Nalor kane, ula kyntu ruh ia ki Jylla ka thain Shatei Lam Mihngi ba kin khang noh ia ka jingpyndokam ia ki plastic ban iada ia ka mei mariang.
Kiba iadonlang ha kane ka jingialang ki kynthup ia u Myntri ka Tnad Development Of North Eastern Region (DONER) G. Kishan Reddy bad Myntri Khynnah ka DONER u B.L.Verma.
