Shillong, Nailur 22 : U Myntri ka Tnad District Council Affairs (DCA) ma Lahkmen Rymbui hynne ka sngi palei, ula ong ba kam pat don satia kano kano ka rai bala shim da ka Sorkar ban pynkylla pat ia ka notification (jingpynbna) ban pyntreikam ia ka CrPC bad CPC ha baroh ki Iingkashari ka Jylla Meghalaya.
U Ma Lahkmen ula iathuh ha ki Nongthoh Khubor ba u Myntri Rangbah ula dep khot ia bun ki jingialang ban iakren ia kane ka kam hadien ba mih ki jingpyrshah na ki Autonomous District Council (ADC).
“Ngin sa peit lada ki ai da ka jingthoh sha u Myntri Rangbah, un sa khot ia ka jingiaang hynrei la ngin bishar thymmai biang ne em, ka dei la ka jong ka kam” ula ong.
Halor ka rai ka KHADC ban bteng ia ka jingpyrshah namar baka notification kam pyllait satia ia ki Iingkashari District Council wat hapdeng ki jingkular ba kam don jingktah ia ka bor treikam, u Myntri ula ong “Ngam don eiei ban bynrap na kane ka jingbatai naba ka Sorkar kala dep ban shim ia ka rai. Ka Kynhun Myntri kala dep shim rai bad ka notification kala mih.Kam shong satia ha nga ban khmih kumno yn lah ban pynkylla ia kane ka notification.Tang u CM uba lah ban khmih bad shim rai ia kane”.
Hynrei ula ong “Nga ki jingtip ba nga lum na kiba bun ki jingialang bala pynlong, ka long ba ka para 4 jong ka Sixth Schedule ka dei beit thik tang jong ki District Council ba kin shim bishar ia ki mukotduma bad para 5 ka kren ia ka bor bala pynkup da u Lat ka Jylla”.
U ma Lahkmen ula ong ba kane ka kam kala mih namar ka long kaba donkam ban ai ia ka bor sha ki District Session Judge hadien bala phiah ia ka Judiciary na ka Executive.
“Ka Sorkar kala lum ia bun ki jingialang bad khatduh kala shim ia kane ka rai bad lada ka KHADC kam sngewtynnad, ngin peit ia kaei kaba u Myntri Rangbah u don ban ong. Namar ngam pat iakynduh ia u, ngam lah ban ong ia kaei ka jingiohi jong ka Sorkar Jylla ia kane ka kam” ula ong.
Ha kajuh ka por, u Myntri ka DCA ula ong ba ka kam shongsuk shongsain ka dei ka Sorkar Jylla kaba dei khmih pura bad ka CrPC ka dei kaba la aibor sha ki Deputy Commissioner ba kin pynjari ia ka kyndon 144 CrPC haba don ka jingkulmar ha ka Jylla.
