Pan u CM haduh T. 2 lak klur na ka Sorkar Pdeng hapoh ka SASCI

Shillong, K’lyngkot 29 : U Myntri Rangbah ka Jylla Conrad K Sangma ula kyrpad ia u Myntri Rangbah Duh ka Ri Narendra Modi ba un tuklar lem ha kaban pynbteng bad pynkhlain ia ka Special Assistance to State for Capital Investment (SASCI), da ka jingbuh ia ka mang tyngka ba duna eh T. 2 lak klur ha u snem ban wan, khnang ban pynneh ia ka jingiaid ki kam pynroi bad nang pynkhlain ia kaei kaba la leh da ki Jylla.

Ha kane ka jingiakynduh ia u Modi, u Conrad ula buh ruh ia ka jingkyrshan ban ai ia ka mang tyngka ba kyrpang na ka SASCI sha ki Jylla bar it jong ka thain Shatei Lam Mihngi (lait noh ka Assam).

“Ki Jylla ba rit ka thain ki ioh 100% na ka Part I jong ka SASCI na kaei kaba ju ai sha ki. Ka Jylla ka kyrpad ba dei ban ai noh 200-300% ia ki Jylla ba rit ka thain na ka bynta ki khyndiat snem ban wan” ula ong.

Ka SASCI ka la kylla long ka nongpyniaid ba kongsan na ka bynta ka jingpynlut pisa ha ka kyrdan jong ki Jylla, da kaba pyndonkam ia ki jingmang pisa kiba iadei bad ki kyndon bad kiba iadei bad ka jingtreikam ban wanrah ia ki jingpynkylla, ban pyntreikam ha ka por kaba biang, bad ban pynbha ia ka jingpyndonkam ia ka pisa – kaba pynlah ia ki Jylla, khamtam ha ka NER ban tei ia ki jingtei kiba bha, ban thaw ia ki lad aikam, bad ban pynneh ia ka jingroi ka ioh ka kot.

“Ka Meghalaya ka la pyndonkam bha ïa ka SASCI, ha kaba ka jingmang pisa ka la kiew na ka ₹200 klur ha u snem mang tyngka 21 sha ka ₹2,370 klur ha u snem mang tyngka 2025. Ka pisa ka la kyrshan ïa ki jingbei tyngka ba kongsan ha ka jingshna ia ki surok ha kylleng ka Jylla, ka jingpynbiang um, ka bor ding, ka jingpynroi sor, ka kam jngohkai pyrthei, ki digital library, bad ki jingpynbha kiba lah ban ïohi ha ka liang ki lad pyniasoh bad ka jingai jingshakri,” ong u Sangma.

U la bynrap, “Ka SASCI ka la long kaba kongsan bha ha kaba kyntiew ïa ki jingtei jong ka Meghalaya bad ban pynbha ïa ki jingim. Palat T.2,000 klur ka la pynbha ia ka jingpyniasoh surok, kyntiew ia ka jingleit jingwan bad ka ioh ka kot. La pynkhlain ia ka jingpynbiang um da ka T.900 klur na ka bynta ki skhim sam um ha ki jaka sor kiba heh, katba T.125 klur ka pisa la pynbha ia ka jingpynmih bording lyngba ka Ganol Hydroelectric Project bad ki substation”.