Shillong Nailar 31: Ki 3 tylli ki Autonomous District Council (ADC) jong ka jylla kila pan por 2 sngi naka sorkar jylla ban ai iaka rai halor ka jingthmu ka sorkar jylla ban pyntreikam iaka Code of Criminal Procedure (CrPC) bad Code of Civil Procedure (CPC) haka jylla baroh kawei.
Ia katei la kyrpad da ki Chief Executive Member (CEM) jongka Khasi Hills Autonomous District Council (KHADC) bad Jaintia Hills Autonomous District Council (JHADC) ryngkat bad u Deputy Chief Executive Member jongka Garo Hills Autonomous District Council (GHADC) ha ka jingialang kaba la lum da u Myntri Rangbah ka jylla u Conrad K Sangma hynnin ka 30 tarik u Nailar.
Haba iakren bad ki nongthoh khubor, u Conrad Sangma u la ong, “Ki District Council ryngkat bad ka kynhun ki nongiasaid aiñ kila pan por 24 -48 kynta ban khmih bniah halor baroh ki mat kiba la kdew bad hadien ba kila dep ban iatai sani kin sa wan iakynduh biang ia ngi bad ngi kyrmen skhem ba ngin lah ban pynpoi ia katei ka kam sha kaba kut”.
U la pyntip, ba ha ka jingialang, la ai jingpynshai ia ki District Council ba kan ym don kano kano ka jingpynduh ne ka jingkyntur pud iaka bor treikam jong ki District Council Court.
“Kino kino ki sienjam kiba la shim mynta bad kiba la ai jingmut da ka sorkar ka long tang ban pyrkhing iaka rukom treikam kaba salonsar jong ki iingkashari hadien ba kala don ka jingphiah iaka bor hapdeng ka Executive bad ka Judiciary” ong u Conrad Sangma.
“Ka Executive mynshwa ka ju tian bishar bad ia katei ka bor la pynkup ne shim na ka 1937 Act bad shisien bala phiah ia ka bor hapdeng ka Judiciary bad ka Executive, ki ADC kim don bor shuh ban bteng bad la mih noh da ki Judicial Magistrate. Ki Judicial Magistrate mynta ki shong tian bishar bad kidei kiba la pynkup bor katkum ki kyndon aiñ. Ki kyndon jongka 1937 ki kdew thik ia ki Deputy Commissioner (DC) namar ha katei ka por ha u snem 1937 ki don tang ki DC” ong u Conrad bad ka bynrap “Kumta iaka bor la pynkup haka Administrative, Executive bad ym don Judiciary ha katei ka por, kumta ki Judicial Magistrates kin hap ban shim ia ka bor na ki katto katne ki kyndon jong ka riti synshar ka ri bad kumta la ai jingmut ban shim naka para 5. Haba ngi ong kumne, ka long ban pynthikna ia ka jingbteng jong ki Judiciary kata na ka ADC Judiciary sha ki Judicial Magistrate kan long ha ka lynti kaba biang,kata kadei ka jingthmu”.
U Myntri Rangbah u la ong “Ki kyndon bad ki bor jong ki district council la kdew shai kdar haka riti synshar ka ri bad ha ka Sixth Schedule, kumta kam don ka jingthmu ban pynduh noh iaka bor jongki District Council”.
Hashwa kane, u CEM ka KHADC u Bah TW Chyne ula ong, ba ki District Council kila pyrshah jur ia katei ka jingthmu ban pyntreikam ia ka jingpynbna paidbah kaba thmu ban pyntreikam iaka CrPC bad CPC haka jylla baroh kawei.
“Ka sorkar jylla kala khot iakren ia ngi halor katei ka mat. Ngi la iatai sani bha bad ngi la rai ba baroh 3 tylli ki District Council jong ka jylla kin iashong pyrkhat shwa bad ki riewstad Aiñ bad bad hadien kane ngin leit iakynduh biang iaka sorkar jylla” ong u Bah Chyne.
U la iathuh, ba ka jingthmu ka sorkar ka long ban pynkup bor iaki Judicial Magistrate kiba la shah thung hadien ba la phiah iaka Judiciary na ka Executive bad ong ruh, ba u Myntri Rangbah ula pynthikna ba ki District Council Court kin ym shah ktah la kidei ki Village Court ne Additional Subordinate Court.
U CEM ula ong, “Namar ba katei ka jingpynbna jong ka sorkar ka long kaba sngewkhia bha, kumta ngi la ia rai ban nym mynjur mardor bad ngi la pan por ban iatai sani hashwa ban shim ia ka rai kaba khatduh halor katei ka mat”
U la iathuh, ba yn sa lum iaka jingialang bad baroh ki MDC ryngkat bad ki nongiasaid aiñ hashwa ban aiti iaka jingtyrwa jongka Council sha ka sorkar jylla halor katei ka mat.
Katkum ka notification la kdew “Ha ka jingphiah pura iaka Judiciary na ka Executive bad katkum ka jingpyntreikam iaka bor kaba la pynkup haka proviso sha ka sub-section (3) jongka Section 1 jongka Code of Civil Procedure, 1908 (Act 5 of 1908) u Lat ka Meghalaya u sngewbha ban pyntreikam ia ki kyndon jongka Code of Civil Procedure 1908 ha ka Meghalaya baroh kawei. Ki District Council Court kin bteng ban shim iaka bor ka jongki na ka paragraph 4 & 5 jongka Sixth Schedule ka riti synshar jong ka ri India.
U Lat ka jylla u bthah ruh ba kiei kiei kiba leh da ki District Court ha baroh kawei ka jylla, hapoh ka Rules for the Administration of Justice and Police in the Khasi and Jaintia Hills, 1937 bad Rules of Administration of Justice and Police in Garo Hills, 1937 dei ban shim katkum ki kyndon jong ka Code of Civil Procedure, 1908.
