Shillong Nailar 10: Ka Harijan Panchayat Committee (HPC) hynne ka sngi Saitjain, kala pan por sa 15 sngi na ka sorkar jylla naka bynta ban iatai sa ia ki katto katne ki mat bad kin sa ai iaka rai kaba khatduh ha kaba iadei bad ka mat ban pynkynriah noh ia ki longiing na Them Metor, Shillong.
Katei ka jingpan por ka HPC kala mih ha ka jingialang kaba la lum da u Symbud Myntri Rangbah ka jylla u Bah Prestone Tynsong uba long ruh u Chairman jong ka High Level Committee, ha kaba la iadonlang u Symbud Myntri Rangbah ka jylla uba khmih ia ka kam pynroi sor u Bah Sniawbhalang Dhar, ka Deputy Commissioner ka East Khasi Hills ka Kong RM Kurbah, ki nongialam ka Harijan Panchayat Committee bad ki heh ophisar sorkar.
“Ngi lah don ia ka jingkren kaba jrong bha halor ka jingthmu ban pynkynriah ia ki longing bad kane ka jingiakren kala long kaba seisoh, hynrei namar ba ki don ki katto katne ki bynta ki bym pat shai, kumta ngi la pan por 15 sngi. Hadien katei ka 15 sngi, ngin sa pyntip ia ka rai ka jong ngi bad hadien kane, ngin sa ia lah ban shim ia ka rai kaba khatduh” ong u General Secretary ka Delhi Sikh Gurdwara Management Committee, New Delhi u Jagdeep Singh Kahlon.
U Jagdeep ym shim la treh ban batai eiei ia ki mat kaba kila pan jingpynshai shuh shuh, hynrei ula ong, ba ki don pat ki katto katne ki mat ia kaba ki hap ban iatai bha.
U Symbud Myntri Rangbah ka jylla u Bah Sniawbhalang Dhar, ula ong, “Ba ka sorkar jylla kala mynjur ban ai por 15 sngi ia ka HPC bad hashwa kane, kan ym don kano kano ka jingiakren hynrei hapoh ka 15 sngi kin sa wan ban ai ia ki jingtip halor ka rai kaba kila shim”
Ula ong, ba ka jingialang hynne ka sngi ka long kaba biang bha bad kane ka jingialang ka lah dei ban long ka jingialang kaban shim syndon ia ka rai kaba khatduh hynrei kala don noh ka jingpan por sa 15 sngi na ka HPC ba kan ioh ban iasyllok bad baroh shwa ba kan shim ia ka rai kaba khatduh.
“Ngi lah rai ban ai por ia ki 15 sngi bad ngi kyrmen skhem ba ka rai kaba kin shim kan long kaba bha” ong u Bah Sniawbhalang.
U Symbud Myntri Rangbah ula ong, ba ka HPC kala dap da ka jingkmen ia ka ‘Blue Print’ kaba la pynkhreh da ka sorkar jylla na ka bynta ban pynkynriah ia ki sha kawei pat ka jaka.
