Shillong, Nohprah 23 : U Nongialam ka All India Trinamool Congress (AITC) Kirti Azad hynne ka sngi thohdieng, ula pan map halor ka jingthoh jong u ha Twitter, kaba iohi kum ka jingibein ia ka riam tynrai ki Khasi.
Ki Nongialam seng sain pyrthei ka Jylla kila pynrem jur ia ka jingkynthoh u Azad haba buh lang ia ka dur jong u Myntri Rangbah Duh ka Ri Narendra Modi, kaba phong ia ka riam tynrai Khasi, ha ka jingwan iuhkjat ba dang shen jong u ha Shillong bad ong “Ym ithuh dei shynrang ne kynthei”.
Haba panmap lyngba ki jingthoh kiba bun, u Azad ula ong “Ka jingthoh jong nga ha Twitter ka dei kaba la pynmut bakla. Kala pynmong ia ka jingsngew jong ki briew. Ia ki nga ong map. Nga da burom bad sngew sarong ia ka jingriew spah ka deiriti jong ngi. Nga babe ia ka jingpynmong da kane ka jingkynthoh. Nga ban jur ia ka jingbam smai ba ngan bat bad burom ia ka riti synshar ka ri. Kum u shipai ka party, nga la iaid beit ha ka lynti jong ka riti synshar kaba dawa ban burom ia ka deiriti jong baroh”.
Ka All India Trinamool Congress kala ong ba kum ka Political Party, ka ngeit ha kaban bat, burom bad pynkhlain ia ki deiriti kiba don hapoh ka Ri.
