Shillong, Jylliew 04: Ka South West Garo Hills Scheduled Caste Welfare Association (SWGHSCWA) kala kyntu ia u Myntri Rangbah ka jylla u Conrad Sangma ban ai bhah 5% na ka bynta ki Scheduled Caste kiba don hapoh ka jylla.
Katkum ka dorkhas kaba la phah sha u Myntri Rangbah, ka SWGHSCWA kala ong “Watla ka Meghalaya kadei ka jylla kaba don iaka Sixth Schedule kaba iada ia ki riewlum, hynrei donkam ruh ban kynmaw ba ki briew kiba dei ki Scheduled Caste kiba la duh lad bad ki Reserved Category katkum ka Constitution jong ka ri bad khlem da don ia kano kano ka jingbhah naka bynta ki Scheduled Caste, ka jingpyntreikam iaka Roster System Reservation kan ym long kaba pura. Kumta dei ban bhah 5% na ka bynta ki Scheduled Caste kiba dei ki nongshong shnong ba pura ka Meghalaya bad kane kadei kaba donkam kyrkieh ban iada iaki Scheduled Caste kiba dun ha ka kamai kajih”.
Ha kaba iadei bad ka jinglong jingman jongka Roster System bad Reservation Policy, ka SWGHSCWA ba katkum ka ritis synshar ka ri kala don ka kyndon haka Article 15 (4) bad 26(4) kaba dei ka hok ha kaban bhah ha ka liang ka pule puthi, iohkam iohjam ne kano kano ka jingleh kaban dei lang naka bynta ki Scheduled Caste bad Scheduled Tribe bad yn ym don mano manor uh kiba lah ban pynkylla ia kane.
“Ha Meghalaya ka jingdon jong ki Scheduled Caste ka long kumba 25,000 kaba long tang 0.58% na ka jingdon paid ha ka jylla, namar ka Reservation Policy jong ka Meghalaya, ki briew kiba dei ki Scheduled Caste kila shah ktah jur ha ka jylla. Katkum ka Meghalaya Reservation Policy kam shym la don kano kano ka jingbhah na ka bynta ki briew kiba dei ki Scheduled Caste. Mynshwa la ai 5% ka Reservation ia ki Hajong, Koch, Rabha, Bodo bad Scheduled Caste ( naka bynta 5 tylli ki jaidbynriew), hynrei hadien ba la pynrung iaka Maan tribe kum ka Scheduled Tribe, haduh 6 tylli ki jaidbynriew ki ioh iaka 5% ka Reservation kaba long ka bym iahap satia bad ka long pyrshah iaka riti synshar ka ri” kila pynpaw.
Kila pynapw ba kiwei pat ki jaidbynriew riewlum la ithuh ia ki kum ki riewlum katkum ka Meghalaya Reservation Policy katba ki jaidbynriew Scheduled Caste kiba sah ha West, East, South bad South West Garo Hills la khein ba kidei ki bym dei ki riewlum.
“Ka long ka bym don jingmut bad kaba pyrshah iaka riti synshar ka ri ba ki Scheduled Tribe (OT) bad ki Scheduled Caste la kynthuplang ha kajuh ka jingbhah” la pynpaw ka SWGHSCWA.
Ka SWGHSCWA kala pynpaw ruh ba hapoh Meghalaya ha ka por ba jied ban leit pule MBBS Nursing ym shim la jied wat tang iwei i dkhot na ka Scheduled Caste bad kumjuh ruh ha ka District Selection Committee, West Garo Hills, Tura na ki 17 ngut ki Surveillance Workers ym shim la jied satia tang iwei ruh na ka Scheduled Caste ne General Category bad wat ha ka State Level ia ka Unreserved Posts la bat beit da kawei ka jaidbynriew riewlum ha ka jylla Meghalaya.
“Kumta ha baroh ka jingjied 100% ka Reservation la ioh tang da ki Scheduled Tribes bad kane kadei ka jingpynkheiñ kaba shyrkhei ia ka Roster Reservation Policy” la pynkut ka SWGHSCWA.
