Shillong, Nailur 30: Ki lai tylli ki Autonomous District Council (ADC) ha ka sngi Nyngkong, kila tyrwa ia ka grant na ka Sorkar Pdeng ba kot T.8877.51 klur na ka 16th Finance Commission na ka bynta ki san snem ban wan.
Na kane, ka GHADC kala tyrwa heh duh kaba kot haduh T.5042.30 klur, ka KHADC kala tyrwa T.2,641.54 klur bad ka JHADC kala tyrwa T.1,019.60 klur, iathuh u CEM ka KHADC Bah Pyniaid Sing Syiem haba iakren bad ki lad pathai khubor hadien ba aiti ia ka dorkhas sha u Chairman ka 16th Finance Commission Arvind Panagariya.
“Ngi la aiti ruh ia ka ADC (2% contingency charge) kaba long T.174.07 klur” ula bynrap.
Haba niew ia ka jingialang bad ka 16th FC kaba seisoh, u Bah Pyniaiad ula kren halor ki lai tylli ki mat ba kongsan bala buh hakhmat da ki lai tylli ki ADC ha ka Commission. Ki ADC kila kyrpad b aka 16th FC kan ai jingmut ia kham bun ka Untied Grant naduh u snem ban wan.
“Ym kum ka 15th Finance Commission, kila ai kham bun ka Tied grant. Ka jingmut ka long, kila phiah ia ka Tied grant kaban pyndonkam eh na ka bynta ki kam ba iadei bad ka um bad ka lehkhuid lehsuba. Lyngba ki jingshem jong ngi, ngi shem ba ka long kaba jynjar ia ngi lada ki dang phiah ia ki song pisa ban pyndonkam. Don ki khep, ngi donkam ia kiwei ki project ban pynroi ia ki skul, college lane ki Iingshnong” ula ong haba bynrap “Khang ban nym iatakhuh ha ka jingpyntrei kam ia ki skhim pynroi, ngi la ai jingmut bad kyrpad ia ka 16th FC ban kham pynjynsur ia ka Untied grant, khnang ban gin lah ban pyndonkam ruh ha kiwei ki kam pynroi bala tyrwa da ki Nongialam Shnong lane Nokma lane ki Elaka”.
U Bah Pyniaid ula pyntip ruh ba ki ADC kila kyrpad ia ka Commission ban pynthikna ba ka song pisa ba ai da ka Sorkar Pdeng sha ki ADC ka dei ban iaid lyngba ka Ministy for Development of North Eastern Region (DoNER) lane North Eastern Council (NEC) ym na ka Ministry of Panchayati Raj (MoPR).
Haba pynpaw ba ki ADC kila shah ktah jur bha namar ka jingkhang ka NGT ia ka kam tih dewiong ha Jylla ha kine ki 10 snem bala leit noh, u Bah Pyniaid ula ong ba kila kyrpad ia ka Commission ban ai jingmut ha kaban ai grant lem ban pyniaid ia ki kam ki jam ba manla ka sngi jong ki Council hapoh ka Revenue Deficit Budget grant ka Sorkar Pdeng.
“Ngi la pyntip sha ka Commission ba baroh lai tylli ki ADC ki shaniah ia ka bhah khajna na ki marpoh khyndew kum u dewiong (ngi ioh jan 25% n aka 100%). Naduh ba khang tuh dewiong, ka JHADC bad GHADC kim shym lalah shuh ban siew ia ka tulop ia ki nongtrei bad kane kala ktah jur bha ia ka jingtreikam ki artylli ki ADC. Kumta, ngi la pynpaw ia kane hakhmat ka Finance Commission bad ngi la kyrpad ba kan ai jingmut lem ha kaban ai grant na ka bynta ka jingtreikam ba manla ka sngi jongki council” ula ong.
 ha ka sngi Nyngkong, kila tyrwa ia ka grant na ka Sorkar Pdeng ba kot T.8877.51 klur na ka 16th Finance Commission na ka bynta ki san snem ban wan.){kind=link}